KATOLIK Profesenel Sosaiti bilong PNG i singaut long planti konsaltesen i mas kamap long ol senis bilong konstitusen pastaim.

Loya na Presiden bilong Katolik Profesenel Sosaiti Paul Harricknen i tok olgeta senis i laik kamap long Nesenel Konstitusen i mas kisim tingting bilong ol pipel tu pastaim.

Harricknen i tok ol pipel i no ken mekim konstitusen olsem wanpela Ekt nating bilong palamen. Olgeta lida na sitisen i mas sanap long rispektim na banisim konstitusen o mama lo bilong yumi.

“Em i no samting bilong ol Memba bilong Palamen (MP) na Nesenel Ekseketiv Kaunsil tasol long senisim ol lo. Gavman i mas harim ol tingteng grup na institusen, ol sios na sivil sosaiti na jenerel pablik tu,” Harricknen i tok.

“Maski ol MP i gat save na strong bilong mekim ol disisen wantaim ol edvais ol i kisim o i stap long han bilong ol, olgeta taim i gat sampela asua i ken kamap na planti askim tu bai i kamap. Olsem lida em i risponsibel em i mas mekim stretpela pasin na holim konsaltesen long olgeta provins na bihain mekim senis.

“Long kamapim Mama Lo bilong dispela kantri Konstitusen Plening Komiti i bin raun long kantri namel long 1972 na 1975 na kisim tingting bilong ol pipel na em i kamapim wanpela konstitusen o mama lo we em i bilong yumi PNG stret. Na nau yumi holimpas na yumi amamas long en,” em i tok.

Katolik Profesenel Sosaiti nau i salensim Nesenel Pandemik Ekt 2020 long Suprim Kot long kot i ken tok save sapos gavman i bin bihainim rot stret long kamapim Ekt.

Long senisim Ogenik Lo bilong Provinsel na Lokal Level Gavman i go long level bilong sevis em i toktok long kisim bek olgeta pawa na sevis na dispela i abrus long tingting bilong skelim pawa na sevis i go daun long ol arapela level bilong gavman.

Harricknen i tok, “Dispela em i wanpela bikpela senis gavman i laik mekim na em i mas kisim moa taim long harim ol pipel pastaim.”

Wankain long en em lo bilong mekim PNG i kamap Kristen kantri.

I tru gavman bilong tude i gat bel na tingting long banisim PNG tasol em i gutpela moa sapos em i larim ol pipel tu i givim tingting bilong ol long dispela ol senis i laik kamap.

Long mekim senis long konstitusen em i no liklik samting. Em i bikpela samting tru. Em i bin kisim taim, planti tuhat na gutpela save bilong ol lida i go pas long kamapim Mama Lo.  Em i no samting nating we yumi ol lida bilong nau i ken pilai long en.

No ken pusim lo long kamap. Harim ol pipel tu.