TUDE gavman bai tokaut long 2020 K5.6 bilien Saplimentari Baset bilong em.

Dispela baset bai kamap long strongim ol wok em gavman i tokaut long em long Stimulus Pekes bilong em pastaim long dispela yia.

Baset bai kamap tu long taim kantri i bungim hevi bilong sik coronavirus (COVID-19).

Palamen bai vot long strongim dispela baset long las de bilong kibung bilong em long dispela taim bipo long em i surukim de i go long Novemba long narapela sindaun long tokaut long 2021 Baset.

Pastaim long dispela yia, Oposisen lida Belden Namah, bihainim ol lo i stap, i bin askim gavman long kamapim Saplementari Baset tasol dispela i no bin kamap.

Insait long dispela baset, i gat bilip, arere long K60 milien gavman i tokaut long givim sapot long Helt Dipatmen long pait agensim COVID-19, gavman bai givim sapot tu long ol bisnis haus, moa long ol liklik i go long namel sais bisnis (SME).

Long Tunde Praim Minista James Marape i tok long sapot gavman i laik givim long ol SME.

Mista Marape i tok gavman i givim K100 milien long Benk Saut Pasifik (BSP) na K50 milien long Nesenel Divelopmen Benk (NDB) long sapotim SME sekta.

Em i tok ol manmeri i ken kisim “Soft Loan” na kamapim wok bilong ol wantaim 4 pesen intares na bekim mani insait long 20 yia.

Tresera Ian Ling-Stuckey, pastaim long dispela yia i tok bikos long hevi bilong COVID-19 kantri i lusim K2.222 bilien revenu long 2020 mani plen bilong em.

Em i tok bikos long dispela IMF nau i tok ikonomi bilong kantri nau i pundaun long negetiv (-) 9 pesen long gros domestik prodak (GDP) bihain long em i bin hop long gro long 2 pesen.

Em i tok gavman i kisim pinis K1.26 bilien dinau mani long Intanesenel Monitari Fan (IMF) wantaim nogat intares long strongim ikonomi.

Arere long dispela, gavman i kisim sapot tu long NASFUND na Nambawan Supa na dinau mani long BSP long sapotim baset.

Insait long baset, ol arapela hap we gavman i lukluk long givim sapot tu em:

• K113 milen long ol distrik na provins long promotim egrikalsa na fud sekyuriti;
• K50 milien olsem prais sapot program bilong egrikalsa ekspot krop prodaksen bilong ol liklik kopi, kakao na kopra fama;
• K150 milien long ol liklik i go long namel sais bisnis (SME);
• K5 milien long Bisnis Stimulus Pekes we i lukluk long strongim ol bisnis i mas holim yet ol wok manmeri bilong ol; na
• K70 milien long strongim olgeta wok bisnis.