Gavman i rausim pinis opis bilong Sif Sekreteri las wik.

 Man husat i stap olsem sif sekreteri Isaac Lupari i wanbel long dispela senis na i lusim opis pinis long Mande dispela wik.

 Mista Lupari i bin go pas long ol wok bilong toktok wantaim ol kampani olsem Pasca, Porgera, P’nyang na Wafi-Golpu. Em i tok em bai i no mekim ol dispela wok moa.

 Praim Minista James Marape i kisim bikpela sapot long gavman long mekim senis long Nesenel Ekseketiv Kaunsil Ekt na Pablik Sevis Menesmen Ekt taim em i putim ol senis long harim bilong ol memba long palamen las wik.

Dispela senis i min olsem posisen bilong sif sekreteri i raus na ol wok bilong en i go long siaman o siameri bilong Sentral Ejensi Kodineting Komiti o CCAC.

Praim Minista Marape i tok, gavman bilong em i luksave olsem opis bilong sif sekreteri i luk olsem i gat planti pawa tumas na i ken bagarapim ol rilensip ol dipatmen i gat namel long ol yet bihainim konstitusen.

Dispela senis em bilong strongim na mekim klia ol wok na long givim edministretiv na fainensel independens long sekreteri bilong NEC, Praim Minista i tok.