GAVMAN bai tokaut long ran bilong balus nogut we i kisim bagarap long Papa Lealea ausait long Mosbi i no longtaim i go pinis, Praim Minista James Marape i tok.

Mista Marape mekim dispela tok long bekim askim bilong Deputi Oposisen lida, Allan Marat long Palamen long asde.

Marat i askim sapos polis i go het yet long mekim wok painaut long wanpela balus bilong Australia we em i hait na kam insait long Pot Mosbi we i laik kisim kokein (cocaine) marasin nogut na go aut tasol i pundaun na bagarap long Papa Lealea long Sentral Provins.

Em i askim tu sapos ol sekyuriti sistem bilong kantri i orait long luksave long ol kain birua balus, sip o dron i wok long kam insait na go aut long kantri.

Marat i askim moa sapos wanpela gutpela ogenaisesen i stap bilong karimaut dispela wok na sapos i gat ol gutpela opisa i wok long dispela opis.

Em i tok PNG inap kisim bagarap, sapos dispela balus i kisim ol teroris i kam insait.

Marape i tok PNG i wok wantaim Australia polis long dispela hevi long Papa Lealea na bai kamapim ripot taim olgeta wok i pinis.

Em i tok nau yet ol lain husat i pas long dispela hevi i stap long han bilong polis.

Em i tok PNG i gat hevi bilong sekyuriti yet na i wok wantaim ol divelopmen patna olsem Australia sekyuriti sistem bilong kantri i kamap strong.

Pastaim long dispela Oposisen lida Belden Namah i bin tok Nesenel Intelijens Ogenaisesen (NIO) i nogat wanpela kwalifaid opisa long ranim ogenaisesen.

“Bikpela hevi long opis bilong Nesenel Intelijens Ogenaisisen em olsem i no gat kwalifait man i stap dairekta long dispela opisa,” Namah i tok.

“I luk olsem i gat planti pait i kamap namel long ol opisa i stap long dispela opis.

“Taim kain sindaun i stap, dispela inap bagarapim sekyuriti bilong yumi.”

Namah i tok em i no gat bilip olsem i gat ol gutpela man i stap.

“Sapos i gat ol kwalifait man i stap long dispela opis, yumi i no inap long lukim ran bilong kain balus (i go long Papa Lealea).

Em i tok NIO i mas wok wantaim Difens na Polis intelijens na wok bung wantaim Australia Intelijens Ogenaisesen.

Em i tok wok bilong NIO na ol dispela arapela opis i bilong kisim ol toktok na save long wanem ol hait samting i wok long kamap.

Mista Namah i tok taim em i bin stap ami opisa long sampela yia i go pinis, gavman i bin sainim wanpela tok orait wantaim Israel gavman long putim ol tawa long ol boda ples olsem Green River long Sandaun Provins, Kiunga long Westen na Musau long Nu Ailan na sapos ol balus i kam ol PNG gavman inap save hariap long ran bilong dispela balus.

Tasol em i tok olgeta gutpela wok i save kamap bihainim sif ekseketiv opisa bilong kantri.

“Taim yu gat CEO husat i save tru ol wok i stap, yu i no inap long bungim ol kain hevi olsem.”