NESENEL Sinod bilong Ivanjelikel Sios bilong Papua New Guinea (ELC PNG) bai i kamap long 2022 na Papua Distrik bai i hostim long Pot Mosbi.

Ol i mekim planti wok nau long bungim ol risos – mani na ol arapela long helpim long mekim dispela sinod i kamap gut.

 Memba bilong Mosbi Not Is John Kaupa em i namba wan man long kamaut na givim helpim. Em i statim ol wok bilong redi bilong sinod taim em i givim wanpela kar long Marimari Luteran Sios long Gordons na tu em i tok bai em i givim K25,000 mani long sios.

Mista Kaupa husat i memba bilong Luteran sios i tok em i baim dispela kar wantaim mani bilong Distrik Sevis Impruvmen Progrem bilong iletoret bilong em long helpim sios i redi long sinod long 2022.

Mista Kaupa i givim luksave na tok amamas long bikpela wok ol sios olsem Katolik, Luteran, United na Seven De Edventis i mekim long strongim spirit na fisikel divelopmen bilong ol pipel long Papua Niugini.

 “Ol sios bilong yumi i sevim ol pipel bilong yumi long edukesen na helt. Ol i serim risponsibiliti o wok wantaim nesenel gavman long helpim divelopmen bilong kantri bilong yumi, Mista Kaupa i tok.

 “Mi bin statim skul long Nomane Luteran Misin stesin long Simbu we i longwe tru na inap go long en long liklik balus tasol.

“Ol Luteran misineri i bin kam na stap wantaim mipela long dispela ol rimot ples namel long 1950 na kam antap. Ol i kam long bringim gospel na tu ol i bringim skul,” Mista Kaupa i tok.

Em i tok moa, “Sios i bringim lait i kam long bilip na skul bilong mipela na long kantri bilong mipela na ol i helpim mipela long wokabaut long lait. Taim ol namba wan lain misineri i kam moa long 300 yia i go pinis ol i planim sid bilong Tok bilong God.

 “Long dispela as mi mas tok tenkyu long yupela olgeta. Dispela wokbung i mas go het yet na  strongim yumi long sanap strong olsem Kristen kantri, Mista Kaupa i tok.

 Pasto na Presiden bilong nesenel sinod Gundu Kagl i tok tenkyu long Memba John Kaupa na tok, “God i harim prea bilong mipela na em i bekim. Sios i nidim trenspot long mekim wok misin bilong en insait long siti. Em i namba wan taim dispela kongrigesen i kisim wanpela bikpela donesen long wanpela nesenel lida.”

 Kost bilong dispela kar em K180,000.00. Dispela em i namba tu kar Mosbi Not Is Distrik i baim. Las yia em i baim wanpela na givim long Korobosea United Sios.

Long soim tenkyu bilong ol, Marimari Luteran sios i givim 5-pela pik long Memba John Kaupa na tim bilong em.

Paul Maima i raitim