BOGENVIL bai kamap hap bilong global komyuniti bihain long Indipendens, Dokta John Momis husat bai pinis wok olsem Presiden bilong Atonomus Bogenvil Gavman (ABG) i tok.

Em i tok kamap bilong dispela ileksen i bikpela hap wok bilong bringim bel isi i go long ailan.

“Sapos yumi kamap independen, dispela bai lukim yumi i kamap sitisen bilong global komyuniti,” Momis i tok.

“Dispela komyuniti i gat planti na kain kain kantri sapos ol i bikpela o liklik, i gat planti samting o no gat, ol i bilong Afrika, Yurop, Esia, Amerika o Pasifik.

“Yumi olgeta bai stap olsem wanpela bikpela komyuniti.

“Ileksen nau mipela i stap long em i no wanpela ileksen nating. No gat. Em i gat bikpela mining. Dispela bai tokim mipela long nupela wei mipela bai stap long em.”

Momis i tok maski hevi i stap, ol manmeri i strongpela lain na olsem ol i bin stap na strongim ol yet na kamapim ol senis.

Em i tok long ol wok we i bin hat, ailan i bin lainim ol asua bilong em na olsem em i redi long mekim senis.

“Insait long hevi, ol manmeri i traim long wokim ol rot, skul, haus sik, kamapim bisnis na strongim yet bilong ol long God.

“Yumi i no ken lus tingting long kain hatwok yumi i mekim na i mas sanap strong,” Momis i tok.

Lucy Nokin bilong Saut Bogenvil tasol nau i wok na stap long Pot Mosbi i bin tok long taim bilong vot i stat long 12 Ogas i tok em i bin go vot bikos em i laik lukim senis long ailan.

“Mipela i laik save husat em dispela lida we bai kisim mipela long tingting bilong mipela long kisim independens,” em i tok.

“Em bikpela tingting bilong mipela, olsem lidaman i mas strongpela man na i tok long rait bilong manmeri.”

Israel Piuaria bilong Mokung viles long Mortlok Atol na Mary Moses bilong Saut Bogenvil tasol i marit long Not Bogenvil na vot long Not Bogenvil Konstituensi tu i tok ol i amamas long vot na i hop olsem vot bilong ol bai karim kaikai.

Ol manmeri husat i marit long ol arapela provins olsem Paul Harricknen bilong Yangoru, Is Sepik na i marit long Bogenvil i go vot tu long dispela de wantaim famili.

Ol manmeri i vot long foapea sia em long presiden, konstituensi ol i kam long em, long meri na Ekskombaten (Ex-combatant).

Kaun i wok long stat na Bogenvil Ilektoral Komisin George Manu bai tokaut long ol risalt long neks wik na bai bringim ol writ i go long Gavman Haus, Konedobu long Trinde 16 Septemba.

Alex Munme i raitim