Las wik Papua Niugini gavman i lonsim 2020-2030 Rotmep bilong Sastenebel Divelopmen Gol Namba 13 bilong Klaimet Rispons bilong em.

Dispela rotmep i gat 30 eksen em i laik mekim kamap insait long dispela 10-pela yia i go long 2030.

Ol eksen em i laik karimaut i stap long ol sekta olsem eneji, forestri, infrastraksa, egrikalsa, minerals, helt, baiodaivesiti na turisim. Namel long ol tu em klaimet gavanens.

Dispela ol eksen bai i helpim PNG long redi long ol hevi i kam wantaim senis bilong klaimet. Sampela dispela ol hevi em ol pipel i pilim pinis insait long kantri.

Taim em i lonsim dispela rotmep, Praim Minista James Marape i tok amamas long Minista bilong Envairomen Konsevesen na Klaimet Senis Wera Mori na Klaimet Senis na Divelopmen Atoriti na UNDP long wok hat tru long sapotim wok bilong klaimet senis insait long Papua Niugini.

Insait long dispela wok i gat tupela hap bilong en. Wanpela em adaptesen na narapela em mitigesen we dispela rotmep i karamapim.

“Papua Niugini i kamapim sampela gutpela mak long ol komitmen bilong en long paitim hevi bilong klaimet senis. Em i soim ol dispela wokmak insait long 2030 ajenda long sampela wok kamap bilong ol pipel na tu long putim i go insait long nesenel visen na polisi bilong ol, Praim Minista Marape i tok.

Residen Representativ bilong UNDP, Dirk Wagener, tu i tok amamas long Klaimet Senis na Divelopmen Atoriti na Gavman long lonsim dispela rotmep.

“Em i bungim wantaim olgeta hatwok bilong hamas mun i go pinis na em i putim wanpela mak we ol arapela i mas wok i go long en. I gat planti arapela kantri insait long wol we i mekim wankain wok tu.

“Planti kantri i wok long plenim na i mekim kamap ol eksen bilong abrusim ol hevi bilong klaimet senis. Tasol sampela kantri tasol i traim long inapim wanpela komitmen bilong ol SDGs long dispela rot. UNDP i amamas tru long em i stap patna bilong PNG long longpela taim tru na dispela rotmep bilong SDG em i soim komitmen bilong mipela long sapotim gavman bilong PNG na pipel bilong en insait long pait bilong ol long klaimet senis,” Wagener i tok.

Dispela rotmep i kamap wantaim mani i kam long UNDP na ol opis bilong klaimet senis na divelopmen atoriti wantaim helpim bilong ol arapela gavman dipatmen i go pas long raitim dispela rotmep.