Ol raskol pasin we i save kamap long Tu Mail long Pot Mosbi i bin i go daun bihain long ol pipel long komyuniti i bihainim gut ol lo bilong COVID-19 na banisim komyuniti bilong ol.

James Wemin mausman bilong Tu Mail komyuniti i tok planti raskol pasin i save kamap long dispela ples tasol ol yut i bin senisim pasin taim ol i bihainim ol lo bilong COVID-19.

“Olgeta lain long siti i save olsem Tu Mail em ples we ol i save pulim bek na bilum bilong ol manmeri na planti ol arapela raskol pasin i save kamap long dispela ples. Dispela em i tru.    

“Tasol taim COVID-19 i kam long kantri, Tu Mail komyuniti i strongim ol lo bilong COVID-19 insait long komyuniti olsem wasim han, werim mask na bihainim kefiu taim long nait long lukautim mipela yet long COVID-19. Taim mipela i mekim ol dispela samting ol raskol pasin tu i go daun na ol yut i stat long senisim ol tingting na pasin bilong ol,” Mista Wemin i tok.

Mista Wemin i tok ol i kisim dispela tingting long lukautim komyuniti bihain long ol manmeri long ol arapela provins i kam pulap long Pot Mosbi na COVID-19 i kam long kantri.

Em i tok ol komyuniti memba i bungim mani na baim ol simen, bab waia na sein long banisim komyuniti bilong ol na kontrolim ol manmeri long muv i go insait na kam ausait long setolmen.

Mista Wemin i tok ol raskol i save pulim ol bilum na bek bilong ol manmeri na ran i go insait long komyuniti olsem na ol polis i save sutim tok long komyuniti. Em i tok, tasol nau ol i sanapim banis pinis, ol raskol bai painim hat tru long ranawe i go insait long komyuniti na hait.

“Sapos mipela i no mekim, husat bai mekim bilong mipela?” em i askim olsem.

Mista Wemin i tok tenkyu long Kontrola na Gavman long luksave long ol. Na em i laik ol arapela komyuniti long siti i ken lukim ol na banisim komyuniti bilong ol. 

Rebecca Negere i raitim