COVID-19 Nesenel Pandemik Rispons Kontrola David Manning i daunim ol taim bilong Kefiu long Nesenel Kepital Distrik long 12:01 klok moning i go long 5 klok moning kefiu na dispela i stat pinis long 3 Septemba 2020.

Dispela senis i kamap i senisim bipo kefiu taim 10 klok nait i go long 5 klok moning kefiu.

Mista Manning i tokaut tu olsem ol stoa we i gat laisens long salim bia i ken salim bia long Mande i go inap long Fraide tasol Sarere na Sande ol i mas pasim stoa.
 Em i tok Nesenel Kontrol Senta i laik bringim bek nomol laip long NCD olsem na ol i daunim taim bilong kefiu. Ol medikol na helt wokmanmeri i ken i go het long lukluk long COVID-19.

“Planti manmeri i ken luksave olsem ol polis i no wok strong long strongim ol kefiu taim, mi laik tok lukaut olsem ol polis em ol redi gut tru na ol i stap na ol i wok long lukluk tasol long wokabaut bilong ol manmeri. Sapos wanpela i brukim lo, ol i bai mekimsave long en.

“Yumi olgeta i save olsem dispela em hevi bilong helt olsem na eksen bilong mipela i mas i go gut wantaim ol rispons plen. Ol pablik i mas noken ting olsem ol i ken raun nating nating long taim bilong kefiu.

“Olsem mi tok pinis, mipela i laikim kantri i mas i go bek long nomol na ol manmeri mas harim ol toktok i kam long helt dipatmen na bihainim,” Mista Manning i tok.

Rebecca Negere i raitim