Ol polis long Bogenvil i sutim wanpela man i dai long Inus long Arawa haiwe rot.

Dispela hevi i kamap bikos ol polis i difendim ol yet long birua.

Sif bilong Bogenvil Polis sevis na Depyuti Komisina bilong polis, Francis Tokura i tok, ol polis i bin wok long mekim wok bilong ol taim ol i lukim wanpela kar we ol sampela man i bin stilim.

Em i tok ol polis i bin stopim dispela kar na askim draiva long ki. Tasol draiva i bin kisim naip na i laik katim polis opisa.

Long wankain taim tu boskru bilong kar i makim gun long polis opisa.

Polis opisa i kwiktaim tru sut pas na sutim boskru long han bilong em na em i dai bikos em i lusim planti blut.

Komisina Tokura i tok moa olsem, ol i bin traim long toktok wantaim wanpela man long Aita long Wakunai distrik husat i bin kisim tupela kar long ol ona bilong ol.

Tasol man i no harim toktok bilong ol polis long bringim bek ol kar i go long papa bilong ol.

Wanpela bilong Jodash Hire Car na narapela bilong wanpela man long Selau.

Nau dispela man Aita i kisim polis kar bilong Tinputz Polis na i ranawe wantaim.

Komisina Tokura i tok, man i dai bikos ol man i laik holim lo long han bilong ol yet. Nogat man i stap antap long lo.

Harim tok na bihainim bai yumi olgeta i ken stap gut.