PORGERA Main bai i op gen aninit long nupela menesmen.

Long dispela wik gavman i givim nupela maining lis i go long Kumul Minerals Holding Limited (KMHL).

KMHL em i kampani bilong gavman. Em i lukautim Ok Tedi Maining Limited tu.

Dispela senis bilong menesmen bilong Porgera Main i kamap bihain long gavman i rausim Barrick Niugini Limited (BNL) wanpela maining kampani bilong Canada. Spesel Maining Lis (SML) bilong BNL i bin pinis long 2019 na gavman bilong Marape-Steven i no laik givim nupela lis.

Dispela disisen i bihainim bikpela tingting bilong Praim Minista James Marape long kisim bek PNG.

Long Tunde bilong dispela wik yet Nesenel Kot long Pot Mosbi i rausim keis bilong BNL bihain long em i laik kotim gavman long disisen em i mekim I no givim ekstensen long maining lis bilong em.

Tasol dispela pait i no pinis yet. BNL bai i salensim gavman yet long kot long disisen bilong en.