MEMBA bilong Wapenamanda, Rimbink Pato i givim luksave long Australia, Nu Silan, Japan na Amerika long K1.5 bilien eneji komitmen bilong ol.

Em i tok maski wol i wok long bungim ol hevi bilong coronavirus (COVID-19), dispela foapela kantri i stap yet long komitmen bilong ol.

Em i tok dispela ol kantri i mekim komitmen long 2018 Esia Pasifik Ikonomik Kopresen (APEC) kibung long kamapim 70 pesen bilong pawa long kantri long 2030.

Pato i tok tenkyu long olpela Praim Minista Shinzo Abe gutpela sapot na wok poroman bilong em wantaim Papua Niugini long taim bilong em olsem praim minista.

Em i tok wantaim Abe, planti ol bikpela projek olsem sapot bilong kamapim pawa, Ramu Haidro Pawa na ol arapela projek long kantri.

 “Mi laik save husat bai go pas long kisim dispela mani (K1.5 bilien) em dispela ol kantri i givim,” Pato i  tok.

“Inap gavman i givim tu asesmen ripot long outkam bilong APEC?

“Opis bilong APEC i wok yet o nogat? Sapos nogat orait long wanem as?

“Tok orait i bin go pinis long kamapim ol pawa lain long Enga, moa long Tsak Veli long Wapendamanda, inap Praim Minista i toksave long wanem taim de tenda bilong dispela projek bai pinis?”

Praim Minista James Marape i tok em bai bekim tasol i askim Pato long raitim dispela ol askim long pepa na givim long em olsem em inap bekim gut.