PLANTI ol Memba bilong Palamen long tok pait i laikim wok stretim i mas kamap long nupela Rot Transpot Mentenens Fan Bil bipo long em i kama lo.

Dispela Bil em Minista bilong Works na Implementesen Michael Nali husat i bringim long palamen i tokaut long em long Tunde.

Mista Nali i mekim Namba Wan Rit pinis na Praim Minista James Marape i muvim mosen olsem i mas wok stretim i mas kamap bipo long Nali i ken go het long mekim Namba Tu na Namba Tri Rit.

Em it ok kamap bilong dispela lo bai lukim ol provins inap long kisim mani hariap na long taim na mani bai redi olgeta taim long kisim na mekim wok.

Long wan wan yia gavman i save yusim olsem K557.66 milien long stretim ol rot.

Tasol pastaim long Marape i muvim mosen, ol arapela Memba i tok dispela bil sapos i kamap olsem em i stap nau bai i no inap karim kaikai maski tingting bilong kamapim bil i gutpela.

Namba wan Memba long tok egensim bil em Is Sepik Gavana Allan Bird husat i tok bil i no tok klia long we Fan bai kisim mani.

Em i tok i gat tupela tok, Minista Nali long toktok bilong em i mekim wanpela tok tasol ol toktok long bil i tok long narapela samting.

Moa yet, Mista Nali i tok fan i no inap kisim mani long ol provins we nau ol i wok long kisim tasol ol toktok long bil i tok fan bai kisim dispela ol mani.

Mista Bird i tok bil i no tokaut tu wanem gavman sapos em i nesenel, provinsal o lokal level bai mekim wanem rot.

Em i tok we tok i stap nau wan wan Memba bai aplai,kisim mani na makim ol kontrakta long laik bilong ol na tok long mekim o stretim ol rot sapos ol i nesenel, provinsal o distrik rot tasol ekispriens i soim wok tru bai i no inap kamap.

“Mista Deputi Spika (Koni Iguan) dispela bai opim rot bilong korapsen,” Bird i tok.

“Ol toktok i mas stret olsem yumi save wanem gavman i mas mekim wanem ol rot olsem yumi ken save husat tru i asua sapos wok i no kamap.

“We ol tok i stap nau, yumi bai sutim tok i go kam na mani i lus pinis na moa mani bai stap bilong go lus.

“Inap yumi kamapim lo we i soim husat tru i mas mekim wanem rot na we mani bai kam na go long fan?”