WESTEN Gavana Taboi Yoto i bin askim Praim Minista James Marape long Palamen long Tunde olsem provins bilong em i mas kisim kompensesen long wok Porgera Main i mekim.

Em i tok Westen Provins i no bin kisim wanpela mani liklik long ol hevi main i bin mekim.

Dispela marasin na ol wok nogut i bihainim Lagai Wara na go daun long Strickland Wara na bihain long Flai Riva na bagarapim ol manmeri na laip long wara na tais we i stap arere long Flai Riva.

Em i tok wantaim Ok Tedi, provins bilong em i save kisim helpim tasol Porgera nogat.

Em i amamas olsem wantaim dispela gavman (Marape Gavman) provins bilong em inap long apim royalti i go antap long 33 pesen.

“Nau olsem gavman i holim 100 pesen long Porgera, inap long ol pipel bilong mi long Nomad, Lake Murray, Suki na Flai Riva bai kisim sampela kompensen.

“Stat long taim Porgera Main i operet, ol pipel bilong mi i no kisim wanpela mani liklik long main.”

Mista Marape i bekim na i tok bikos long dispela as Gavman bilong em i laik kisim dispela main na ranim bai em i ken luksave long olgeta hevi na givim helpim.

Em i tok stat long Kumul Maining Holdings Limitet i kisim spesel maining lis (SML) long Porgera Main (long las wik), gavman bai givim luksave long ol manmeri.

Tasol em i tok em i no amamas olsem Barrick Niugini i go yet long kot long stap yet.

Marape i tok i gutpela Barrack i go long kot tasol Barrrick i mas tokaut long we gavman i asua long kisim main.

“Maski taim Barrick i operet, no gat wanpela papagraun o ol lain husat i kisim bagarap long hevi bilong main i traim long pasim main.

“Barrick i mas amamas long dispela na i ken toktok gen long wok yet tasol long wok, dispela bai aninit long daireksen bilong gavman.”

Marape i tok long dispela taim Porgera Main bai givim luksave long olgeta lain husat i kisim bagarap long wok bilong em.

Em i tok sapos gavman inap long ranim Ok Tedi, em i no lukim wanpela na as long gavman i no ken ranim Porgera Main.