PRAIM Minista James Marape i tok gavman bai kamapim wok painim long hevi i stap long Galp ov Papua.

Em i mekim dispela tok long bekim askim bilong Galp Gavana, Chris Haiveta long Palamen kibung long Tunde long ol poisin bilong ol main olsem Ok Tedi na Porgera i tromoi long wara na bihain i goaut long solwara.

Mista Haiveta i askim long wanem wok gavman bai mekim long stretim ol hevi i stap long wara na solwara em Ok Tedi Main na Porgera i kamapim.

Em i tok em i makim maus bilong ol pipel long Westen, Galp na Sentral Provins husat i kisim hevi long ol wok maining.

Dispela poisin em tait (Karen) i kisim long Flai na go olgeta long Galp na Yule Ailan long Sentral Provins.

Na wanem wok em Envairomen Menesmen Ekt o Bil bilong Ok Tedi bai mekim long helpim ol pipel bilong Galp ov Papua?

Em i tok maus bilong Flai Riva oltaim i gat ol pipia em wara i save kisim i go daun na dispela poisin i bagarapim ol manmeri na laip long wara stat long Westen Provins na i go pinis long Yule Ailan long Sentral Provins.

Mista Marape i tok dispela i bikpela askim na gavman bai mekim wok painim long ol hevi i pas long wok bilong tupela main.

“Mipela bai askim Envairmen Dipatmen long mekim wok painim long ol hevi pas long solwara long wok bilong Porgera na Ok Tedi Main,” em i tok.

“Mipela i kamapim pinis Osen Polisi we long dispela polisi mipela bai lukluk long sekim ol wok nogut i pas long Ok Tedi na Porgera main.”