I GAT planti wok yet i stap bilong strongim Fainens sistem bilong gavman i wok gut, Fainens Minista Rainbo Paita i tok.

Em i tok long sampela provins, dispela sistem i wok gut, tasol long ol arapela dispela sistem i no wok.

Mista Paita i mekim dispela tok long bekim askim bilong Simbu Gavana, Michael Dua long long Palamen kibung long Tunde.

Mista Dua i askim bilong wanem as sampela distrik long provins bilong em i no save kisim mani gut na no kisim mani long taim.

Em i askim tu sapos i gat rot gavman i mas strongim yet Intanesenel Fainens Menesmen Sistem (IFMS) o sapos nogat rausim na putim wanpela sistem we i ken wok gut.

Em i mekim dispela askim bihain long provins bilong em i kisim 9-pela mun bipo long inap long kisim distrik sevis impruvmen program (DSIP) na provinsal sevis impruvmen program (PSIP) mani bilong ol.

“Tingting bilong kamapim Intensenel Fainensel Monateri Sistem i gutpela,” Paita i tok.

“Dispela long lukim wok bilong salim mani o kisim mani na ripot bilong em i kamap hariap.

“Tasol bikos long sampela hevi, dispela sistem i no wok gut long sampela hap.”

Mista Paita i tok i gat planti as dispela sistem i wok na sampela as em bikos long hevi olsem ol opisa i no gat gutpela trening, long no gat komyunikesen netwok, na no gat opis na opisa long graun long mekim wok.

“Mista Spika sapos i gat nid long trening ol opisa, opis bilong mi i redi long givim long trening ol lain long provins.

“Mi wantaim Seketari bilong Fainens i bin rait long opis bilong em na toksave long em.

“Sampela hevi em bikos kepseti olsem no gat tren opisa na no gat inap opisa long graun long mekim wok.

“Intanet em bikos long no gat komyunikesen tawa na sampela taim bikos long hevi bilong weda, sapos ren, em bai hat long komyunikesen i kamap gut.”

Memba bilong Nawae, Kennedy Wenge i bin askim tu Minista Rainbo Paita long sanapim ol longpela tawa olsem komyunikesen i ken kamap gut.

Paita i tok dispela em wok bilong Minista bilong Komyunikesen na em bai askim Minista Timothy Masiu na Minista bilong Stet ov Entaprais, Sansindran Muthuvel long wok wantaim na kamapim infrastraksa we i ken helpim long dispela sistem long wok gut.