Ol Polis long Nesenel Kepital Distrik i tok klia olsem wanpela polis opisa bai i sasim pipel husat i no werim mask.

Bihainim ripot olsem ol polis i sasim ol lain i no werim mask, Royal PNG Constabulary (RPNGC) i givim wanpela namba long ol pablik long ringim taim ol i bungim kain hevi olsem. Dispela namba em:  3244 210.

NCD Metropoliten Suprintenden Perou N’Dranou i tok olsem i no gat wanpela lo i tok ol man husat i no werim mask na raun long pablik bai baim sas bilong ol i no werim mask.

Suprintenden N’Dranou i mekim dispela tok bihain long ol ripot i kamap olsem ol polis i sasim ol lain i no werim mask long baim K200.

“Long dispela taim yet, mipela i no kisim komplen long ol pablik olsem polis i fosim ol pipel long baim sas sapos ol i brukim COVID-19 lo, na mi laik olsem dispela pasin mas no ken kamap,” Suprintenden N’Dranou i tok.

Suprintenden N’Dranou i tok ol dispela toktok we i kamap i no gat evidens bilong en tasol sapos i gat sampela evidens i kamap orait ol lain husat i kisim hevi long dispela kain pasin i ken ringim Met-Sup long 3244 210 na ripotim.

Suprintenden N’Dranou i singaut long ol komyuniti long NCD long bihainim ol COVID-19 lo na ol i mas werim mask. Em i tok long karim aut ol dispela lo long siti em i hat tumas bikos ol manmeri i no laik long harim tok na bihainim.

Rebecca Negere i raitim