Em i hat tru long strongim ol lo bilong COVID-19 long siti taim ol manmeri long siti i no harim tok na bihainim, Nesenel Kepita Distrik (NCD) Metropoliten Suprintenden Perou N’Dranou i tok.

Em i tok, ol polis i bin rausim sampela ol PMV bas long rot i no long taim i go pinis bikos ol i no bin bihainim ol lo bilong COVID-19 olsem, werim pes mask, stap longwe long narapela na karim 15 o liklik namba bilong ol pasindia insait long bas.

Ol polis i bin mekim dispela bikos ol bas opereta i no bihainim ol tambu we gavman i putim long en, Suprintenden Perou i tok.

“Long strongim ol COVID-19 lo na tambu em i bikpela salens tru na i hat moa taim ol manmeri i no harim tok na bihainim.

“Tasol Konstabulari i gat strongpela tingting long i go het long strongim ol manmeri long harim tok na bihainim ol lo bikos COVID-19 em i bikpela birua long ol komyuniti insait long NCD,” Suprintenden N’Dranou i tok.

Long wankain taim, Edukesen Minista Joseph Yopyyopy tu i tok em i hat tru long fosim ol skul long siti tu long bihainim ol lo bilong COVID-19.

Pasin bilong ol manmeri long sakim tok i wok long givim hat taim long gavman long karim aut o strongim ol lo bilong COVID-19 long siti.

Rebecca Negere i raitim