Ol Gavana bilong 22 provins long Papua Niugini i kamapim wanpela tim o grup ol i kolim kolisen long pinisim Jenda Beis Vailens (GBV) long PNG.

Ol i singaut long nesenel gavman long kamapim sapot bilong strongim ol intenesenel lo na tu givim taim bilong ol long karimaut ol tingting bilong daunim GBV long ol provins bilong ol.

Insait long wanpela miting we Gavana bilong Enga Provins Peter Ipatas i go pas na Gavana bilong Nesenel Kepital Distrik (NCD) Powes Parkop i lukautim long en, ol gavana bilong ol provins i toktok long hevi we GBV i kamapim long kantri na ol i luksave olsem vailens long ol meri i bagarapim humen rait long bikpela mak tru insait long kantri na i pasim developmen long kamap.

Gavana Parkop i tok, long stap olsem meri insait long kantri em i minim olsem stap wantaim laip we i pulap long nogut na bagarap, liklik sans long kamap gutpela na nogat rot bilong tokaut long tingting bilong ol.

Long dispela as, Gavana Parkop i tok dispela kolisen or grup mas helpim ol meri na toktok long hevi bilong ol. Ol meri i gat rait aninit long lo long i gat sans long gutpela laip na laip we i no gat vailens long en.

“Mipela i luksave long olgeta wok we i kamap long daunim GBV long kantri, tasol ol dispela wok i no bin inap long pinisim GBV o pasin bilong putim daun ol meri o sakim ol i go long sait na i no givim gutpela luksave long ol we i save kamapim GBV.

“Mipela bai givim taim bilong mipela long mekim olgeta samting mipela inap long mekim long daunim GBV na apim jenda ikwaliti, rispek na wokbung,”Gavana Parkop i tok.

Gavana Ipatas tu i tok GBV i kamap bikpela hevi long kantri bikos ol polis i no mekim gut wokpainimaut na mekimsave olsem na GBV keis i save stap olsem tasol.

Gavan Ipatas i tok em i gat strongpela tingting olsem olgeta memba bilong Palamen bai sapotim dispela tingting we Gavana Parkop i putim.