LONG Mande dispela wik long Hela Provins ol sumatin long St Joseph’s Tari Secondary Skul i werim yunifom bilong ol, penim bodi bilong ol long graun na holim het na krai na wokabaut i go long lukim wanskul, pren na brata bilong ol husat i slip long Tari haus sik mogi

Dispela piksa bilong John Michael Yaparia i soim dispela sori wokabaut ol sumatin I bin mekim.

Ol ripot i kam long Tari i tok yangpela man David Tindipi em i wanpela sosel sains sumatin na em I gat driman long winim skul na kamap long wanpela mak long bihaintaim, tasol ol birua i katim sot laip bilong em taim ol i kilim em long Sande.

Wanpela sumatin i tok, “Em i hat tru long sindaun isi long klasrum na lainim samting long wanem mipela i save pret olgeta taim na kisim was olgeta taim nogut birua i kam insait na kilim mipela.”

Ol sumatin i krai na wokabaut long tok, ‘inap plis, inap long dispela pasin bilong kilim ol yangpela nating’, sumatin ya i tok.

Dairekta bilong Edukesen long Hela Provins i salim tok sori bilong dipatment i go long Tari Sekenderi Skul na i mekim strongpela tok egensim dispela pasin nogut we i kilim yangpela Tindipi.

Em i tok indai bilong yangpela Tindipi em i no lus bilong ol klasmet tasol em i soim tu olsem ol pikinini na ol yangpela i no stap long gutpela banis we i ken lukautim ol long kain ol birua.

Em i tok nau skul i stap long bikpela sori na edukesen sevis long Hela i ken helpim long kaunselim ol sumatin.

Rosa Koian i raitim