PNG Human Rights Advocacy Organization, Magna Carter PNG i tok strong  long ol polis long no ken birua o paitim ol disabel manmeri o pikinini.

Magna Carter PNG i no wanbel tru long pasin we ol polis i mekim long Mista Jerry Hensen wanpela ai pas man long 4 Ogas 2020. Mista Hensen i bin wokabaut i go bek long haus bilong en bihain long skul long Yunivesiti ov Papua Niugini taim ol polis i holim em long Gerehu na paitim em na karim em i go lokim em long Boroko Polis Stesin.

PNG Asembli ov Disebol Pesen (PNG ADP) i tok nogat tru long dispela pasin i kamap na i singaut long Dipatmen bilong Komyuniti Developmen na Rilijen long helpim long painim ol lain husat i mekim nogut long Mista Hensen na mekim save long ol.

ADP i askim Komisina bilong Polis David Manning tu long lukluk long dispela hevi na rausim ol bikhet polis opisa. ADP i tok ol dispela kain polis opisa i westim mani bilong ol takis peya na ol i mas no ken stap insait long Polis Fos.

“I ken i gat kefiu long 10 kilok nait tasol dispela i no givim rait long yupela long kisim wanpela aipas man na tokim em na ol eskot bilong en long pus ap long rot taim yupela i paitim ol na bihain karim ol i go lokim em long sel,” ol sampela konsen sitisen i tok.

Dispela em i no namba wan taim dispela pasin i kamap long ol disebol namel long COVID-19, Magna Carter PNG i singaut long ol lida bilong ol polis long lukluk long dispela hevi na stretim.

Maus meri bilong Magna Carter PNG, Shirley Kaupa i tok em i sori tru long lukim Kristen gavman bilong PNG i no tingim ol disebol na ol manmeri husat i gat spesel nid taim ol i laik redi long rispon long COVID-19.

I gat bikpela gep i stap namel long ol disebol na ol nomol manmeri. Planti ol disebol i ken mekim ol samting wankain olsem ol nomol manmeri olsem na ol lain husat i save lukautim ol rait i mas givim rispek long ol rait bilong ol disebol long stap insait long ol dispela ektiviti,” Kaupa i tok.

Kaupa i tok moa olsem, ol disebol i gat planti rot blok long laip bilong ol long wan wan de long komyuniti bilong ol bikos long ol lo bilong COVID-19. Em i tok kain olsem lo bilong stap long haus i no go gut wantaim nid bilong ol disebol. Em i bagarapim bodi bilong ol, helt, edukesen na laip bilong ol.

Planti disebol husat i save lukluk long ol arapela long helpim ol long stap laip olgeta de, olsem ol sevis provaida, ol famili na pren i painim hat tru bikos long planti tambu we i kamap long ol manmeri long muv i go i kam.

Dispela i ken putim ol long mak nogut long ol i bai no inap long kisim kaikai, marasin na ol arapela bikpela samting tu. Na ol i bai painim hat long was was, kukim kaikai, na kaikai na mekim ol arapela samting.