LAS wik  New Dawn Fm i bin ripot olsem  Sif bilong Bogenvil  polis sevis na Bogenvil stet ov Imejensi kontrola Francis Tokura i tok wok painimaut i wok long go het yet long ol polis husat i bin stap insait long hevi i bin kamap long Bogenvil ileksen.

SOE kontrola Tokura  i bin tokaut olsem sampela polis opisa bilong em i stap insait long dispela hevi.

Mista Tokura i askim olgeta kendidet wantaim ol sapota bilong ol long bringim ol evidens bilong ol polis husat is tap long hevi bai em i ken sasim ol.

Em i tok wanpela polis opisa tasol ol i sasim em na rausim em long wok na wok painimaut i go het yet.

Em i tok Bogenvil polis sevis i gat wok na responsibiliti bilong sapotim opis bilong Bogenvil ilektrol komisin long ranim 2020 ileksen gut.

“Bogenvil Polis sevis i mekim komitmen long bringim  dispela ileksen long ol pipel bilong Bogenvil olsem na mipela i laik lukim dispela i kamap gut,” Mista Tokura i tok.

Em i tok long dispela kain taim hevi bilong ol polis i mas gat evidens bilong em. Na em i tok em i no kisim wanpela komplein i kam yet long Sentral na Saut Bogenvil.

Mista Tokura i askim olgeta pipel long Bogenvil long harim tok na bihainim olgeta lo bilong ABG jenerel ileksen.