Wanpela kibung bilong toktok long Soseri na Sanguma i kamap bikos long ol hevi we i kamap long kantri long Sorcery Accusation Related Violence (SARV) i no long taim i go pinis.

Catholic Bishops Conference (CBC) bilong Papua Niugini na Solomon Ailan (PNGSI) i go pas long lukautim dispela kibung long onlain vidio komyunikesen ol i kolim Zoom.

Ol lain husat i stap insait long dispela kibung em, Asbisop bilong Madang, Asbisop Anton Bal, Bisop bilong Mendi; Bisop Donald Lippert, Deputi Presiden bilong Divine Word University Pater Philip Gibbs, Dairekta bilong Polisi Plenning na Developmen, Michelle Taumpson, Nesenel Kodineta bilong Family and Sexual Violence Action Committee (FSVAC), Marcia Kalinoe na Dokta bilong mental helt Dokta Uma Ambi. I gat ol sampela tu husat i givim sampela tingting we i mekim dispela bung toktok i kamap gutpela.

Fr Ambrose Pereire sdb Sosel Komyunikesen Seketeri bilong CBC i tok dispela bung toktok i kamap long mekim awenes, tingting i go bek, na sapotim ol viktim bilong SARV na ol famili bilong ol.

Asbisop Anton Bal i tok ol manmeri i save sutim tok long sanguma taim ol i no save long wanem as man, meri o pikinini i kisim bikpela sik o i dai. Em i tok em i wanpela bilip we i nogat evidens bilong en tasol ol i save yusim long taim bilong sore o taim wanpela man i dai.

Bisop Donald Lippert bilong Mendi i tok ol hevi i kamap bikos long SARV i daunim bel isi na rispek insait long sosaiti na em i tok strong olsem kain ol prektis i ken kamapim bikpela bagarap long sosaiti sapos yumi no sekim na stretim.

“Long Sauten Hailens SARV i kamap bikpela tru na i kamap olsem samting we i no bilong ol tumbuna o bilong kalsa bilong ol,” em i tok.

“Mipela i mas wok strong long stopim dispela hevi. Em i no gutpela samting we i wok long kamap long sosaiti,” em i tok.