HEVI bilong kalapim boda o boda krosing i stap yet, wanpela coronavirus (COVID-19) bod
memba bilong Sandaun Provinsal Gavman i tok.

Richard Ali i tokim Wantok Niuspepa long las wik olsem maski gavman i salim ol ami na polis
long was long boda bilong Papua Niugini na Indonesia, ol manmeri i raun i go kam yet.
Em i mekim dispela tok long taim Nesenel Pandemic Respons na Polis Komisina, David
Manning i tokaut long namba wan COVID-19 sikman long Vanimo long las wik.
Dispela man husat i kisim sik i bin stap long wanpela woksop long Pot Mosbi na taim em i go
bek i bin gat dispela COVID-19 binatang na i go wantaim.
Mista Ali i tok bihain long dispela ripot, bod bilong em i sindaun na skelim ol wok bilong
banisim dispela sik.
Em i tok dispela man na famili bilong em nau i stap long aisolesen senta. I no gat ripot long
famili bilong em i gat dispela sik.
Em i tok Mista Manning i givim oda pinis long Kefiu i kamap long Vanimo, stat long 10 klok
nait na pinis long 5 klok moning.
Tasol em i tok maski ami na polis i stap, ol i was tasol long ol sek poin o long wea ol boda pos
olsem Wutung i stap.
“Long ol rurel ples, dispela em bus na no gat polis o ami i stap long lukim husat i go long
narapela sait na kambek o ol lain long narapela sait i kam insait na go aut,” Ali i tok.
“Mipela i putim was long hia tasol wari em olsem namba bilong COVID-19 i wok long go antap
na sik i ken isi long kam long Papua.”
Wari bilong Ali i bihainim wari em Katolik bisop bilong Daru Kiunga Daiosis, Giles Cote i bin
mekim long ol boda ples bilong yumi.
Bisop Cote i tokim Wantok Niuspepa pastaim long dispela yia olsem Papua na Wes Papua
Provins i gat moa long 3000 COVID-19 keis na namba i wok long go antap yet.
Em i pret olsem taim i no gat sekyuriti opisa i stap long boda, sik inap kam insait na bagarapim
ol manmeri.
“Olgeta taim mi save tingting planti olsem ol manmeri long daiosis inap kisim bagarap taim sik
coronavirus i kam,” Bisop Cote i tok.
“Planti hap bilong provins i bus ples na no gat gavman opisa i stap long was long boda.
“No gat wanpela mak i stap tu long soim we boda i stap. No gat tru na olgeta i bus ples.”
Em i askim gavman long kamapim moa boda pos long boda bilong PNG-Indonesia boda olsem
ol sekyuriti fos i ken stap na was long ol ples.

Paul Zuvani i raitim