EM I no seif na i no gutpela long ol manmeri i maket long Peace Park, wanpela meri lida Goroka i tok.

Merifa Mopalo, wanpela asples na lidameri long Goroka taun i bin mekim dispela long las wik taim Goroka
taun atoriti i givim tok orait long maket i kamap long Peace Park.
Peace Park i stap arere long Goroka ples balus.
“Mi olsem wanpela mama long hia (Goroka), mipela i save bringim ol fres kaikai i kam long salim long
bikpela maket,” Mopalo i tok.
“Tasol dispela i kamap bikos wok stretim i bin kamap long bikpela maket na Goroka taun atoriti i bin askim
mipela long salim kaikai long Peace Park.
“Sampela manmeri i wok long mekim maket long ol arapela hap olsem arere long bikpela haiwe.
Mopalo i tok tasol dispela i no stret bikos wok stretim long bikpela maket i pinis na em i no save long as
Taun Atoriti i no opim nupela maket na ol manmeri i wok long maket yet long ol hap olsem Peace Park.
Em i tok maket long Peace Park i no seif bikos taim bikpela smok balus i kirap em i save salim bikpela win,
nois na smok (jet blast) i go insait long maket ples na rausim kaikai bilong ol.
“Mipela i givim sevis long jenerel pablik na taun atoriti i mas givim luksave,” Mopalo i tok.
“Sapos balus i pundaun na brek bilong em i lus, mipela bai kisim bikpela bagarap.
“Mi askim taun atoriti long opim nupela maket hariap olsem ol manmeri i ken stap gut na seif na salim
kaikai bilong ol.”
Em i tok taim ol i stap long open ples, ren na san i save kukim na wasim ol na dispela i no gutpela.

Sape Metta i raitim