NUPELA kopra na kakao baiya long Madang provins i painim hat long salim kopra bilong em
long mani mak bilong K500,000.

Tupela bikpela ekspota long Madang no laik baim kopra bilong em na ol beg i stap nating long
weahaus long Karkar ailan.
Luke Guan, husat i go pas long Ling Guan na husat i save baim kopra long gutpela prais olsem
K1.40 long wanpela kilogram i tok em i sori olsem kopra bilong ol lokal fama bai lus.
Em i save baim long gutpela prais taim ol arapela baiya i baim long 90 toea long wan wan
kilogram.
Mista Luke i tokaut long dispela hevi long las wik Fraide taim em i bung wantaim ol kopra fama
long Kinim stesin long Karkar ailan.
Kampani bilong Mista Luke i kam insait nupela long baim kopra na kakao long ol rurel fama
long Sumkar na Raikos distrik long Madang, tasol prais em i baim i gutpela na i winim ol arapela
olpela kopra baiya.
Narapela gutpela samting long kampani bilong Mista Luke em ol transpot bilong em i save go
insait long ol rurel ples long baim kopra na dispela i mekim isi long ol fama.
Antap long dispela em i save givim ol nupela kopra beg long ol fama long putim kopra.
Madang Provinsal Gavman i luksave long gutpela sevis Ling Guan na kampani i mekim na
tupela mun i go pinis i givim K1.5 milien olsem prais.
Gavana bilong Madang, Peter Yama i bin tok orait na givim dispela mani long ol fama.
Long las wik Fraide planti ol kopra fama i sori long Luke taim ol i luksave olsem planti kopra
beg i stap nating.
Em yet i tokaut long ol fama tu tok olsem tupela bikpela ekspota long Madang em Globe antaim
Prestine i no laik baim kopra bilong em.
Planti ol rural kopra fama husat i bin kamap long miting long las wik Fraide i autim bel hevi
bilong ol olsem ol i no laikim politiks i go insait long sait long baim kes-krop bilong ol rural
fama.
Sabub Gong, wanpela kopra fama bilong Waskia sait long Karkar ailan i tok planti ol fama i no
amamas long pasin tupela bikpela ekspota em Globe wantaim Prestine kampani i mekim.
Sampela fama i askim tu Mista Luke long wanem samting em bai mekim long arapela hap mani
we Madang provinsal i givim kampani bilong em long baim kopra na kakao long ol rurel eria
long Madang.
Mista Luke i bekim tok olsem em bai go het yet na baim kopra na traim long painim ol arapela
ekspota husat i stap ausait long Madang provins long baim kopra bilong em.

James G. Kila i raitim