NO GAT gutpela saveman o kwalifait man i stap long opis bilong Nesenel Intelijens
Ogenaisesen (NIO), Oposisen lida, Belden Namah i tok.

Em i tok sapos i gat kain opisa o ol opisa, bai no gat nius bilong ol manmeri o ol balus samting i
kalapim boda bilong yumi.
Em i mekim dispela tok long taim wanpela balus bilong Australia i hait na kam insait long Pot
Mosbi tasol i pundaun na bagarap long Papa Lealea long Sentral Provins.
“Bikpela hevi long opis bilong Nesenel Intelijens Ogenaisisen em olsem i no gat kwalifait man i
stap dairekta long dispela opisa,” Namah i tok.
“I luk olsem i gat planti pait i kamap namel long ol opisa i stap long dispela opis.
“Taim kain sindaun i stap, dispela inap bagarapim sekyuriti bilong yumi.”
Namah i tok em i no gat bilip olsem i gat ol gutpela man i stap.
“Sapos i gat ol kwalifait man i stap long dispela opis, yumi i no inap long lukim ran bilong kain
balus (I go Papa Lealea).
Em i tok NIO i mas wok wantaim Difens na Polis intelijens na wok bung wantaim Australia
Intelijens Ogenaisesen.
Em i tok wok bilong NIO na ol dispela arapela opis i bilong kisim ol toktok na save long wanem
ol hait samting i wok long kamap.
Mista Namah i tok taim em i bin stap ami opisa long sampela yia i go pinis, gavman i bin sainim
wanpela tok orait wantaim Israel gavman long putim ol tawa long ol boda ples olsem Green
River long Sandaun Provins, Kiunga long Westen na Musau long Nu Ailan na sapos ol balus i
kam ol PNG gavman inap save hariap long ran bilong dispela balus.
Tasol em i tok olgeta gutpela wok i save kamap bihainim sif ekseketiv opisa bilong kantri.
“Taim yu gat CEO husat i save tru ol wok i stap, yu i no inap long bungim ol kain hevi olsem.”

Paul Zuvani i raitim