INDEPENDEN Komisin Egens Korapsen (ICAC) i wanpela long ol ajenda palamen i mas
vot long mekim em i kamap lo taim ol memba bilong palamen i bung gen long neks wik
Tunde.

Dispela bai namba tri taim palamen bai traim long vot long lukim sapos dispela bil i ken
kamap lo.
Las tupela taim palamen i bin traim long mekim dispela bil i kamap lo em long 2012 na 2018.
Ol memba i save vot tasol taim namba tri vot i kamap bilong lukim bil i kamap lo, dispela i
no save kamap.
Gavman i traim long kamapim ICAC lo stat long 2012 tasol i no inap i kamap inap nau.
Pastaim Seketeri bilong Konstitusinel Lo Rifom Komisen Dokta Eric Kwa na nau Seketeri
bilong Atoni Jeneral i tok sapos dispela bil i kamap lo, dispela bai mekimsave long ol
lidaman.
Dispela ol lidaman em ol Memba bilong Palamen na het manmeri bilong ol opis bilong
Gavman na stetutori ogenaisesen, ol wod kaunsil na ol arapela husat i go pas long ol pablik
opis.
Em i tok wok bilong ICAC bai i no inap stap olsem wok bilong Ombudsmen Komisin.
Em i tok dispela lo bai go moa na givim pawa long toksave long kain mekimsave Kot i mas
givim long lida manmeri.
Narapela Bil we i go wantaim ICAC Bil em Wisil Blowa Bil na dispela Bil i kamap lo pinis.
Palamen i kamapim dispela lo long Februeri kibung bilong em.
Dispela lo i tok long nogat bagarap i mas kamap long ol lain husat i ripot long pasin korapsen
i kamap long ol pablik opis.
I gat planti ol hevi i pas long korapsen olsem Manumanu graun long Sentral Provins we
Gavman i no tokaut klia yet long wok painim i bin kamap.
Dispela ripot em pablik i wet yet long lukim na harim.
Palamen bai toktok tu long stap bilong Nesenel Pendemik Rispons (NPA) lo sapos em bai
stap sampela taim pastaim o nogat.

Paul Zuvani i raitim