BOGENVIL jenerel ileksen i stat las wik Trinde na sampela hevi tu i kamap pinis.
Sampela vota i i no amamas bikos nem bilong ol i no stap long komon rol na ol i no inap vot.

Ol i askim bilong wanem na dispela i kamap?
“Olsem wanpela bilong ol dispela vota i no gat nem, mi laik save sapos Ilektoral Komisin i yusim
tupela narakain komon rol long Referendum na long 2020 jenerel ileksen? Mipela i bin vot gut long
referendum na no gat hevi i bin kamap, ” wanpela vota husat i no laik kolim nem bilong em i tok.
Long Bogenvil tu i gat hevi i kamap long taim bilong poling. Sampela paul pasin i kamap na ol pipel i
no wanbel.
Sampela kendidet i bin bung long Kuri Vilis Risot long namba 15 Ogas 2020, na toktok long ol dispela
hevi.
Ol i askim Presiden John Momis long lukluk long dispela hevi tasol John Momis i no moa gat pawa
bilong stretim dispela. Em i ken givim edvais tasol, dispela vota i tok.
“Long taim bilong vot long kisim Referendum 98.2 pesen i bin vot bilong Referendum. Dispela ileksen
i soim hevi i stat pinis long dispela wokabaut i go long independens,” vota ya i tok.
Bikpela askim i go long Ilektoral Komisina George Manu long lukluk long dispela hevi na stretim.
Tokaut gut long ol pipel long wanem as na planti nem i no stap long komon rol.

Carolyne Ketsimur i raitim