PAPUA NIUGINI Difens Fos i givim wanpela stua bilong en long Murray Barracks long putim
ol saplai bilong rispons long COVID-19.

Deputi Kontrola bilong Nesenel Pendemik Rispons na Ekting Helt Seketeri bilong Nesenel
Dipatmen bilong Helt, Dokta Paison Dakulala i tok tenkyu long PNGDF long helpim bilong ol.
Em i tok wokbung wantaim, em i bikpela samting long daunim hevi.
“Mipela i amamas long helpim bilong olgeta lain. Dispela tasol bai kamapim senis namel
long yumi,” em i tok.
“Mipela i gat bikpela salens long Nesenel Kepital Distrik. Ol namba i wok long i go antap yet.
Mipela i gat bikpela hevi tu long Westen Provins. Mipela i gat ol planti namba long Morobe
na tu ol arapela 10-pela provins.”
PNGDF i givim dispela stua haus long soim sapot bilong ol long mekim ol wok bilong daunim
COVID-19.
Dokta Dakulala i tok, ol PNGDF soldia em ol paslain bilong dispela rispon wankain olsem ol
polis na helt woka husat i nidim ol Pesenel Protektiv Ikwipmen (PPE) we bai stap insait long
dispela stua haus.
Em i tok tenkyu long ol PNGDF husat i wok insait long dispela stua haus na em i askim ol long
lukautim gut ol dispela saplai i stap insait.
“Wanpela bikpela salens mipela i bungim em long sekyuriti bilong ol saplai bikos planti lain i
laik baim,”em i tok.
Dokta Dakulala i tok moa olsem ol dispela saplai mas i go hariap long ol provins na ol
komyuniti i nidim.
Em pinis
Kepsen: (L-R) CWO Gilbert Pahuli, lojistik opisa Nola N’drewei, Opisa in Sas Saplai Kampani
Mesa Kulaia Augustine, WHO Mausman Dr Luo Dapeng and Deputi Kontrola, Paison
Dakulala.