TOK PISIN, em i tokples bilong yumi ol Papua Niugini stret. Dispela hap tok em i tru tude long nupela
jeneresen bilong PNG.

Planti bilong ol i kamap long ol taun na ol i no klia long tokples bilong
papamama bilong ol. Yumi ken pulim stori long kain kain stail Tok Pisin bilong rijon o ples bilong
yumi, tasol long taim bilong rit na rait, bai yumi brukim bus nabaut.
Las wik Trinde, Ogas 5, Wantok Niuspepa, i bin selebretim 50 yia bilong en. Wantok i wanpela Tok
Pisin niuspepa tasol bilong PNG tude. I kam inap nau, i no gat narapela niuspepa i save kamap oltaim
long Tok Pisin.
Long taim Wantok i bin kamap long 1970, PNG i wok long redi long selp gavman na independens. Ol
manmeri long taun husat i ken rit na rait long Inglis i kisim nius long ol Inglis niuspepa o i harim long
redio. Tasol planti lain long ples i no klia long rit long Inglis olsem na gavman i yusim Wantok long
toktok wantaim ol pipel long tokples bilong ol stret, Tok Pisin. Wantok i skulim ol pipel tu long rait
long Tok Pisin. Long planti yia, Wantok wantaim Tok Pisin Baibel i mekim dispela wok.
Wantok Niuspepa i yusim Tok Pisin diksineri em man i statim niuspepa, Pater Frank Mihalic, svd i bin
raitim, ol i kolim The Jacaranda Dictionary and Grammer of Melanesian Pidgin. Orait bihain long en,
Fr Mihalic i raitim liklik Stail Buk bilong Wantok Niuspepa na ol dispela tupela buk i stia bilong
Wantok Niuspepa. Diksineri i kamap olsem Olpela Testamen, na Stail Buk i olsem Nupela Testamen
insait long niusrum bilong Wantok. Tasol sori tru, i gat bikpela nid long apdetim ol dispela tupela
buk. Tok Pisin i wok long gro na i senis. Ol yangpela bilong tude i no save moa long planti olpela Tok
Pisin wod olsem kasang (pinat) taunam (moskito net) ananas (painapol) bembe (bataplai), ambusa
(dolfin). Nupela teknoloji tu i kamapim planti ol nupela wod yumi yusim long Tok Pisin. Na ol kain
wod olsem ATM na email na SMS na Facebook i no gat narapela wei long raitim long Tok Pisin.
Orait Wantok i bung wantaim Oxford University Press na kamapim nupela Tok Pisin disineri ol i kolim
Papua Niugini Tok Pisin English Dictionary. Dispela liklik poket diksineri em i gutpela stia bilong ol
manmeri i lainim Inglis na Tok Pisin. Diksineri i bihainim buk bilong Fr Mihalic na tu, i gat ol nupela
toktok i stap insait long en. I gat tupela seksen bilong en, namba wan hap em i Tok Pisin i go long
Inglis na namba tu hap em i Inglis i go long Tok Pisin. Planti lain i wok long yusim dispela diksineri
tude.
Yumi wan wan i gat stail bilong yumi long pulim stori long Tok Pisin. Ol Nu Ailan i gat stail bilong ol
yet, ol AROB i gat stail bilong ol, na ol Momase i gat stail bilong ol tu. Em i orait. I no gat tok long en.
Tasol long taim bilong raitim Tok Pisin, i mas gat wanpela rot tasol bilong raitim tok. I no ken raitim
long wanpela wei na neks taim yu senis na raitim long narapela wei. Nogat. Ol man bai no gat bilip
long yu sapos yu wok long senisim oltaim. Dispela i wankain tu long Tok Inglis. Ol manmeri bilong
Amerika i gat stail bilong ol yet long toktok na ol Inglan i gat stail bilong ol. Tasol long taim bilong
raitim Inglis, olgeta i bihainin wanpela rot tasol. Yumi tu long PNG i mas mekim wankain long Tok
Pisin.
Planti pipel i no luksave olsem i gat ol Tok Pisin diksineri i stap. Ol i ken yusim Tok Pisin disineri long
raitim gut ol toktok bilong ol. Bihain long 50 yia nau, ol pipel i wok long brukim bus yet long rait long
Tok Pisin. Wanpela gutpela eksampel em ol edvetaismen i save kamap long TV na ol niuspepa. Ol i
yusim kain kain stail bilong raitim Tok Pisin. Ol lain i raitim ol dispela edvetaismen em save bilong rit
na rait long Tok Inglis i kilim ol. Tasol ol i paul long raitim stretpela Tok Pisin. Ating sapos ol i ritim
Wantok Niuspepa oltaim bai ol i kisim save long stretpela wei bilong raitim dispela tokples bilong
yumi ol PNG stret.

Wantok i mekim wok bilong promotim Tok Pisin inap 50 yia nau. Tasol gavman tu i no luksave long
dispela bikpela wok. Mama lo bilong kantri i luksave long Inglis, Tok Pisin na Hiri Motu olsem ol ofisal
tokples bilong Papua Niugini. Tasol ol gavman dipatmen i no save laik putim ol pablik tok save o ol
edvetaismen bilong gavman long Tok Pisin na Hiri Motu. Ol i save putim long Inglis tasol bikos ol i
ting olgeta manmeri bilong Papua Niugini i save long Inglis tasol. Bai olsem wanem nau? Mobeta
dispela nupela jeneresen bilong ol lida tude i mas seklim na promotim tu Tok Pisin, tokples bilong
yumi ol PNG stret.