GAVMAN i senisim ol lo aninit long Kriminal Kod Ekt long apim mekimsave bilong jenda beis
na soseri vailens.

Deputi Praim Minista na Jastis Minista Steven Davies i tok jenda beis na soseri vailens i no
stap insait long lo tasol mekimsave bilong kilim man i dai bikos long strongpela tingting long
kilim, we i kamap bikos long dispela kain vailens, em i go antap long laip yia long kalabus.
Ol dispela senis i kamap bai givim rait long ol kot long apim ol mekimsave bilong ol kraim we
i kamap aninit long jenda beis na soseri vailens, Minista Davies i tok.
Tasol, Presiden bilong PNG Wimen Loyas Asosiesen, Pauline Toliman Mogish i tok i gat nid
long planti infosmen o eksen i mas kamap long ol lo we i stap pinis.
“Jastis i mas kamap taim wanpela jenda beis o domestik vailens keis ripot i kamap long
namba wan taim yet,” Toliman i tok.
Mista Steven i tok, ol kalabus i stap long mak bilong dai i bai dai tasol kebinet i wok long
toktok yet long ol i bai karimaut dispela eksen olsem wanem?
Tasol, Judisial na Ligel Sevis Komisin i wok long tingting planti long indai olsem penalti bai i
stap insait long lo bilong PNG o nogat, em i tok.
Long stat bilong mun Julai, memba bilong Wewak Open, Kevin Isifu i kamap Siaman bilong
Judisial na Ligel Sevis Komisin, Mista Steven i tok.
Indai olsem Penalti i bin kamap strong gen long 2013 long rispon long planti dai i kamap
bikos long soseri tasol ol i no bin karimaut wanpela eksen yet long ol dispela lain husat i
brukim lo long PNG long 1954 i kam inap nau.
Nau yet 20 kriminal i stap long mak bilong dai.