TEN klok nait i go inap faiv klok moning kefiu long Nesenel Kepital Distrik (NCD) bai stap yet,
Kontrola bilong Nesenel Pendemik Rispons na Polis Komisina David Manning i tok.

Mista Manning i mekim dispela tok long tok klia long ol paul toktok i wok long kamap long
NCD.
“I no bin gat stop long kefiu. Kefiu i stap yet na bai i go het yet aninit long nupela lo. Mipela i
bin kisim planti toktok long ol pablik long dispela. Ol pipel i save karim dispela sik i go i kam
olsem na taim yumi stopim ol pipel long muv raun em yumi stopim vaires long i go i kam,”
Mista Manning i tok.
Kontrola Manning i rait i go long Sif Ekseketiv Opisa bilong Nesenel Geming Kontrol Bod,
Imelda Ago long stopim ol paul toktok em i wok long givim long pablik long geming olsem
pokis. Em i tok ol operesen bilong ol geming fesiliti mas bihainim taim bilong kefiu na mekim
wok aninit long lo i kam long opis bilong en.
Mista Manning i tok wanpela kriminel wokpainimaut bai kamap long ol paul infomesen we
Nesenel Geming Kontrol Bod i givim aut long pablik.