MILEN BE Provins i tokaut long namba wan keis bilong COVID-19 long provins. Dispela wik
we i bringim namba bilong ol COVID-19 keis long kantri i go antap long 333 long Mande, 18
Ogas.

Ol arapela provins long kantri we i gat COVID-19 em Sentral, Westen Provins, Morobe, Wes
Sepik, Sauten Hailans, Nu Ailan, Is Nu Briten, Isten Hailans, Nesenel Kepital Distrik, na
Atonomus rijon bilong Bogenvil.
Namba wan keis long Milen Be provins em wanpela yanpela meri husat i gat 18 krismas. Em
i no bin raun i go long ol arapela provins. Ol i kisim sempol bilong en long Alotau Jeneral
Haus sik na testim long PNG Institut bilong Medikol Risets. Em i wanpela bilong ol 10-pela
nupela lain husat i konfem olsem ol i gat COVID-19 long dispela taim. Ol narapela 9 pela keis
long Mande em ol lain long NCD.
“Mipela i wok long lukim ol pipel bilong NCD i wokabaut raun long ol pablik ples taim ol i no
werim mask o karamapim pes bilong ol. Ol PMV tu i no bihainim lo mipela i putim pinis na
mi laik tok strong olsem em i nid bilong olgeta manmeri long bihainim ol lo bilong pendemik.
“Gavman i mekim olgeta samting long lukautim olgeta pipel na em i laikim ol pipel i mas
lukautim helt bilong ol yet na famili bilong ol tu,” Mista Manning i tok.
Ol 65 pesen bilong olgeta positive keis em ol man na 35 pesen em ol meri. Namel long ol,
em wanpela i gat 84 krismas na wanpela pikinini husat i gat 2-pela krismas.
Long las tupela wik, NCD i ripot olsem ol i kisim planti sempol, dispela i kamap bikos planti
manmeri long siti i go kisim tes.