LAS wik ileksen bilong Atonomus Rijon bilong Bogenvil (AROB) i bin op. Ol manmeri long Bogenvil yet
na ol pipel bilong ol husat i stap long bikples PNG tu i bin gat sans long vot long nupela palamen
bilong ol.

Dispela ileksen i kamap wanpela yia bihain long ol pipel i bin vot long referendum we bikpela lain tru
i soim olsem ol i laik kamap wanpela independen kantri.
Olgeta asples Bogenvil wantaim famili bilong ol i bin gat sans long vot las wik. Maski sapos ol i bilong
narapela ples bilong PNG, tasol sapos ol i marit long Bogenvil na nem bilong ol i stap long ilektoral
rol, ol i gat sans long votim man o meri ol i gat bilip long en.
Long Mosbi na Lae, i bin gat ripot bilong ol pipel bilong Bogenvil husat i kamap long vot. Tasol i gat
ripot tu olsem sampela manmeri i no inap long vot bikos nem bilong ol i no bin stap long ilektoral rol.
Ol i sekap long saplimenteri rol, na sampela i painim nem bilong ol tasol sampela i nogat. Ol i no
amamas. Ol i tok long taim bilong vot long referendum, nem bilong ol i bin stap long lista na ol i bin
vot. Ilektoral Komisin bilong Bogenvil i tok ol i bin yusmim wankain ilektoral rol bilong referendum
long dispela ileksen. Tasol olsem wanem na nem bilong sampela lain i no bin stap long ilektoral rol
nau?
I gat kain kain komplen i wok long kamap nau long dispela ileksen bilong Bogenvil. Ol ripot i tok
planti pipel i sutim tok i go i kam nau olsem sampela paul pasin i kamap long dispela ileksen. I gat ol
toktok i kamap olsem sampela lain i laik bagarapim dispela ileksen ol pipel bilong Bogenvil i wet long
vot long en. Na i gat ol komplen i kamap olsem risal bilong sampela ilektoret em bai i no inap soim
trupela laik bilong ol pipel.
Husat i save sapos ol dispela toktok i tru o nogat. Olgeta taim i gat nesenel ileksen i kamap long PNG,
wankain ol toktok tu i save kamap. Olgeta manmeri bai i no inap long amamas.
Long taim bilong vot long referendum, ol pipel bilong Bogenvil i bin soim gutpela eksampel long
PNG. Ol i kamap long ples bilong vot, putim vot bilong ol na i no gat ripot bilong kros pait o ol disput i
kamap. Olgeta i pasim tingting na i go tromoi vot bilong ol. Olsem na nau ol pipel i paul long harim ol
dispela komplen i kamap.
Dispela ileksen bilong palamen bilong AROB em i wanpela bikpela samting. Husat ol memba ol pipel i
makim bai i go pas long mekim wok bilong winim driman bilong ol Bogenvil long stap independen
long PNG.
Dispela ileksen i bin gat tu planti ol meri kendidet i resis long sia bilong wan wan konstituensi, na
long wok bilong presiden na long sia bilong ol meri. Ol i soim gutpela eksampel long ol arapela
provins olsem ol meri inap sanap long strong bilong ol yet na resis long ol sia bilong palamen.
Ol sios i go pas long autim tok bilong stap isi na yusim het long votim ol gutpela lida. Ol i givim stia
tok long no ken givim nating vot long ol wantok o pren husat bai i no inap kamapim trupela wok
bilong lukautim ol pipel. I bin gat planti ol awenes program tu i kamap long mekim ol pipel i klia long
dispela impoten ileksen bilong ol.
I bin gat tu ol bikpela salens i kamap long dispela taim bilong ileksen long Bogenvil. COVID-19 i
mekim na i no gat ran bilong balus. Ol pipel ausait long AROB i no gat sans long go bek long ples na
vot. Olgeta wok bilong ranim ileksen i bin stap long han bilong ol pipel bilong Bogenvil yet.
Yumi hop fainel risal bilong dispela ileksen bai karim kaikai na kamapim ol gutpela na stretpela lida
bilong ol pipel bilong Bogenvil. Yumi hop bai olgeta wok bilong ileksen i ran gut inap long taim bilong
vot i pinis na olgeta pepa i kam bek long gavana jeneral. Yumi hop ol dispela memba bilong palamen
bilong Bogenvil bai inap long stap strong na makim tru laik na tingting bilong ol pipel.

Dispela ileksen em i namba wan step bilong longpela rot i stap yet long ol pipel bilong Bogenvil i
winim driman bilong ol. Dispela rot i no stret. I gat planti buk na ples daun na kain kain salens i stap
long rot.
Yumi hop husat ol lida i kamap bihain long ileksen bai inap long winim ol dispela salens na stiaim
Bogenvil i go long winim mak ol pipel i bin putim long taim ol i vot long referendum. Ol pipel long
olgeta kona bilong kantri tu, i putim ai wantaim ol lain bilong Bogenvil long harim risal bilong dispela
ileksen.