KATOLIK Sios i statim nau pait egensim vailens bilong soseri na sanguma.

Long makim dispela namba de bilong namba wan International Day Against Sorcery Accusation Violence Katolik Daiosis long Mendi wantaim ol patna grup bilong en olsem Consultative Implementation Monitoring Committee (CIMC) i holim wanpela bikpela bung long Mendi taun long Sauten Hailans Provins.

Dispela bung i lukim planti yangpela, ol meri, ol komyuniti na sios lida i bin bung long Mande na toktok long pasin no gut bilong kilim nating ol meri, na sampela taim ol man na ol pikinini long saspek bilong sanguma o soseri.

Planti hap bilong Papua Niugini i kalabus insait long dispela hevi.

Bisop Donald Lippert bilong Mendi Daiosis i tok, husat i kilim narapela i brukim lo pinis.

Planti nius ripot i kamap pinis long hevi bilong vailens bilong sanguma tasol i no gat gutpela rot bilong stretim dispela hevi.

Bisop Lippert i tok, nau em i taim bilong stopim dispela ol birua na kraim bilong sanguma. Olgeta pipel i mas sanap na wok bung wantaim long stopim dispela hevi.