LAS Fonde  i wanpela histori seremoni i bin kamap we ol pipel bilong Goilala long Sentral provins i tok sori long Katolik sios na ol pipel bilong kantri Frans long wanpela Katolik pater ol i kilim 68yia i go pinis.

Dispela pater  i bin wanpela Frans Katolik pater, em Jules Dubuy i bin dai long Ononge Peris long Woitape Lokal Level Gavman long Goilala Distrik long 1952.

Dispela Dubuy Rikonsiliesen o tok sori seremoni i kamap long 6 Ogas  long las wik bihainim de pater i bin dai.

Ol lokal i bin kisim tupela yia long redi long dispela bung bilong tok sori wantaim helpim bilong memba bilong ol, William Samb husat i Minista bilong Transpot tu.

Ol pipel long Goilala i bilip olsem dai bilong dispela pater we ol bikman bilong Goilala i bin kilim, i mekim na ol i kisim tok nogut na sindaun bilong ol i no gutpela.

Mista Samb i tok dispela i mekim ol komyuniti long tok em na askim long blesing na divelopmen i go long Goilala Distrik.

“Mipela i lukim ol divelopmen long infrastraksa, man na meri i kisim save na senis na ol sindaun bilong ol narapela Papua Niugini i kamap gut na Sentral provins tu, tasol mipela Goilala distrik i no gat long wanem mipela i traim long painimaut wanem as tru na mipela i stap olsem,” em i tok.

“Taim mi go long palamen namba wan taim, mi wok long askim long wanem as tru kain sindaun i kamap na tenkyu mipela i bin painimaut as bilong pater i bin dai.”

“Sapos yu lukim Goilala, bai yu lukim ol hap hap samting na ol samting i stap bilong dispela ol misineri bilong Frans, olsem ol rot, ol haus, ples balus, tasol ol sevis we gavman i ken tok ol i mekim em rot bilong Tapini na Tapini Haiskul.

“Planti bilong ol dispela sevis em Katolik sios i ranim we ol misineri i bin kamapim em ol i go bek pinis.

Minista bilong Komyuniti Divelopment, Yut na Rilijen, Wake Goi i tok sori long gavman bilong Frans long asua i bin kamap.

“Mi makim maus bilong gavman, ol pipel long Goilala na mi tok sori long ol pipel bilong Frans na ol famili bilong Pater Jules Dubuy.

“Kain pasin i bin kamap na rilesensip bilong gavman na ol pipel bilong Frans na Papua Niugini i no bin kamap strong orait dispela bung bilong tok sori i ken kamapim senis.

“Ol pipel bilong Frans i ken kam long PNG olsem haus bilong ol na mipela tu i ken go long Frans,” Goi i tok.

Long wankain taim, Embeseda bilong Frans, Philipe Janvier-Kamiyama i makim maus bilong ol famili bilong Pater Jules Dubuy .

Em i tok famili i painim hat long kam bikos long kamap bilong coronavirus (COVID-19) lokdaun i stap.

Embeseda Janvier-Kamiyama i tok kain pasin ol pipel bilong Goilala i mekim long tok sori i ken strongim wok bung namel long Frans na Goilala i ken go het.

Ol famili bilong Pater Dubuy i raitim pas na tok, “Long Frans na Yurop, dispela bung i kamap olsem wanpela piksa we i ken soim ol narapela kantri long sindaun gut bihain long ol bikpela pait, long stat gen we Goilala i soim dispela rot.

“Long dispela, mipela i lusim rong bilong yupela na long memori bilong tumbuna kandre bilong mipela, mipela i laikim bai dispela tok sori bung i lukim ol gutpela developmen long dispela Distrik, provins na moa yet long kantri.”

Long wankain taim, Bishop bilong Bereina Katolik Daiosis, Otto Separy i lusim rong bilong ol pipel bilong Goilala na i tok long God long God i ken lusim rong bilong ol man na olsem pikinini bilong ol i ken gat gutpela sindaun.

Ol manmeri i bihainim pasin tumbuna long soim tok sori bilong ol na givim wanpela pik  go i long Embeseda Janvier-Kamiyama na 110 grem gol i go long Bishop Separy.

Charlpetson Koi iraitim