OL DISISEN bilong stretim hevi bilong Manam pipel i mas stap long ples na go antap long gavman na i no long gavman i kam daun, Praim Minista James Marape i tok.

Em i mekim dispela tok long taim em i go long Bogia wantaim sampela gavman Minista olsem Minista bilong Egrikalsa, John Simon taim ol i go long Manam Risetelmen Opis eria, long Bogia, Madang provins long las wik.

Mista Marape i mekim dispela wokabaut bihainim askim bilong Memba bilong Bogia Robert Naguri na ol lidaman bilong Manam.

Insait long dispela wokabaut Praim Minista i lonsing tu Awar plentesen ridivelopmen long Yawar LLG long Bogia distrik.

Marape i tok Manam risetelmen em i wanpela wok bilong nesenel gavman.

Em i tok gavman bilong bipo i no givim inap taim na wok i no kamap hariap tasol wantaim gavman bilong em, wok i mas kamap hariap.

Em i tok Bogia distrik i gat sampela ol nesenel program bilong gavman we wok i no pinis long em na gavman bilong em bai givim taim long helpim na wok i mas kamap hariap.

Em i tok em i luksave olsem hevi bilong ol pipel bilong Manam ailan i lusim ples na i sindaun long ol kea-senta we ol i stap longpela taim na gavman bilong em bai givim taim long stretim dispela hevi.

Nau yet ol pipel bilong Manam ailan i lusim ples na i stap long ol kea senta long Potsdam, Asuramba na Mangem long bikples Bogia na Sumkar distrik moa long 16 yia.

Taim PM Marape i go pundaun long Bogia stesin long helikopta kar i kisim i go raun lukim ol projek em Bogia MP wantaim DDA i kamapim olsem nupela divelopmen long Bogia helt senta na opis eria bilong Manam Risetelmen Atoriti (MRA) na tu em i givim skul toktok long ol sumatin bilong Holi Spirit Memorial Sekenderi skul.

PM Marape i bin bungim siaman bilong MRA, Dokta Boga Figa wantaim ol sampela wokman long MRA eria we i stap klostu long Holi Spirit Memorial Sekenderi Skul.

Ol arapela gavman minista husat i bin go wantaim Marape em Minista bilong Fainens, Renbo Paita, Maigresin na Boda Divelopmen Minista, Wesley Nukuntz, Egrikalsa Minista, John Simon, vais minista bilong Maining na memba bilong Usino Bundi, Jimmy Uguro na vais minisa bilong Egrikalsa na Daulo MP, Pogio Ghate.

James G. Kila i raitim