PRAIM Minista James Marape i mas tok stret long hevi bilong balus i bagarap long Papa Lealea long Sentral Provins, ausait long Pot Mosbi.

Oposisen lida Belden Namah i mekim dispela askim long las wik bihain long no gat wanpela klia tok i kam long opis bilong Mista Marape long hevi bilong balus na kago em i karim.

Long dispela taim planti sut tok i go long wanpela bikpela opisa na sampela ol bikpela manmeri long ol gavman opis na polis (ol i kolim nem bilong ol) husat i wok klostu long Dipatmen bilong Praim Minista i pas long dispela hevi.

I gat tok nau olsem Polis Komisina David Manning nau i saspendim Deputi Polis Komisina, Operesen Donald Yamasombi.

Gavman i makim Yamasombi long go pas long wok painim long dispela hevi.

Tasol nau olsem Manning i stopim em long go pas long dispela wok painim, em i no klia husat bai go pas long dispela wok painim.

Long taim dispela i kamap, Praim Minista James Marape i askim Yamasombi long go het long wok bilong em.

Bikos long dispela tupela ol disisen, Mista Namah i tok i luk olsem planti askim nau i stap long opis bilong Praim Minista.

“Em i isi long mak bilong kago em dispela balus inap karim tasol watpo na balus i no inap long kirap long graun,” Namah i askim.

“Em i tru olsem balus i karim spak marasin olsem ripot i soim tasol i gat narapela kago tu o nogat.

“Watpo na balus i no inap kirap long graun long dispela liklik samting.

“I no gat luksave i stap long dispela ples balus we balus i pundaun long em na watpo balus i go pundaun long dispela hap.

“Husat tru i givim tok orait orait na ol i klinim ples olsem dispela balus i ken go na pundaun.”

Namah i tok i gat planti askim long dispela hevi na olsem Marape na Kramer i mas kamaut na tok stret long dispela hevi.

“Mi askim Praim Minista long tokim Polis Minista na Polis Komisina na ol arapela memba bilong Nesenel Sekyuriti Kaunsil na ol sekyuriti ejensi olsem Nesenel Intelijens Oganaisesen (NIO), Polis, Difens Intelijens, Nesenel Eapot Kopresen, PNG Ea Sevis Limitet na Kastom na Boda Sekyuriti we i wok aninit long Nesenel Sekyuriti Kaunsil long wok wantaim Australia Federal Polis (AFP) long karimaut gutpela wok painim olsem ol lain husat i asua na brukim lo i mas kisim stret mekimsave ol i mas kisim long em.”

Long 26 Julai Australia Pailot, David John Cutmore (52) i falim balus long Australia i kam long Papa Lealea ples balus long kisim dispela spak marasin.

Ripot i tok taim balus i laik kirap, hevi bilong kago i winim hevi bilong balus na dispela i mekim em i ran i go insait long bus.

Ripot i tok tu olsem balus i karim olsem 750 kilogram bilong kago kokein (cocaine).

Long sait bilong mani sapos ol i salim dispela spak marasin long strit bilong Australia ol inap kisim mani long mak bilong K1.5 bilien (Aus$800 milien).

Nau yet Cutmore i stap long han bilong polis long Bomana haus kalabus.

Australia polis i holim pinis 8-pela man long Australia em hevi bilong spak marasin na hevi bilong balus i pas long ol.

PNG polis i mekim wok painim yet long ol manmeri long PNG husat i pas long dispela hevi.

Paul Zuvani i raitim