OL polis long Nesenel Kepital Distrik i sasim wanpela man Isten Hailans bihain long em i bin mekim ol toktok long kilim Praim Minista James Marape long sosel midia. Dispela man, Dominic Aku Jason i gat 27 krismas na em i bilong Daulo long Isten Hailans provins.

Polis Komisina David Manning i tok ol polis i sasim Aku aninit long Kriminal Kod bikos dispela em i wanpela bikpela asua tru. Em i tok lo i no inap isi long ol lain husat i mekim kain toktok olsem long kilim lida bilong wanpela independen kantri.

Mista Manning i tok Dominic Aku Jason i save yusim narapela nem tu Nicky Jason na bipo ol polis i bin arestim em long pasin bilong stil na kilim man na stilim na yusim kar bilong narapela man.

“Ol polis i mekim wok painim long ol dispela toktok em i mekim long sosel midia las mun we em i tok, ‘PMJM Yu step daun hariap bipo long katres i kisim het bilong yu.’ Jason i stap nau long Bomana CS,” Mista Manning i tok.

Em i tok ol polis i wok long askim dispela saspek bihain long Praim Minista i bin putim komplen bilong em. Bai em i kamap long kot long bihain taim.

Mista Manning i tok lukaut tu long ol manmeri i yusim sosel midia long pretim ol manmeri o mekim ol giaman toktok. Em i tok ol polis i strongim wok bilong ol nau long putim was long ol kain toktok i kamap long sosel midia na bai arestim ol manmeri husat i mekim ol dispela kain pasin.