POLIS i sasim man Australia, David Cutmore aninit Nesenel Pendemik Ekt 2020 taim ol wokpainimaut i wok long kamap yet long ol spak marasin we i wok long i go i kam long PNG na Australia. Cutmore i gat 52 krismas.

COVID-19 Pendemik Kontrola na Polis Komisina David Manning i tok Cutmore na foapela arapela man i bin sanap long Waigani Distrik Kot long Tunde 11 Ogas na keis bilong ol i surik i go long 25 Ogas 2020.

Mista Manning i tok Cutmore na wanpela man Itali Carlo D’Attanasio na tripela man long Papua Niugini i go sanap long Waigani Distrik Kot. Ol i go stap long Bomana Imigresen Senta long wetim 25 Ogas long i go bek long kot.

Em i tok ol i bai kisim sampela moa sas aninit long Kriminol Kod Mani Londaring  na Teroris Fainensing Ekt taim ol polis i go het long mekim wokpainim.    

“Cutmore i kisim sas bilong karim 611 spak marasin insait long balus na em i no bihainim lo bilong Intenesenel Trevol aninit long Nesenel Pendemik Ekt 2020. Carlo D’Attania i kisim sas long wanpela kaun bilong karim 611 kilogrem spak marasin na wanpela kaun long holim 50 grem spak marasin aninit long Kastoms Ekt,” Mista Manning i tok.

Ol i bilip olsem D’Attania i putim 611 kilogrem spak marasin long bot na i karim i go long Kupiano. Ol i kisim dispela spak marasin na karim i go long Papa Lea Lea long Sentral provins we ol i laik flaim i go long narapela kantri.

Mista Manning i tok, ol tripela man PNG i kisim sas long helpim long karim dispela spak marasin i go i kam. Ol dispela man em, Morgan Mogu, krismas bilong en 35 na em bilong Abau. Shane Dikana, krismas bilong en 30, na em bilong Sentral Provins na Dominic Terupo, krismas bilong en 35 na em bilong Mortlock Ailan long Atonomos Rijon bilong Bogenvil.

“Mipela bai sekim olgeta kona olsem Praim Minista James Marape i tok pinis insait long wokpainimaut bilong mipela,” Mista Manning i tok.