KONTROLA bilong COVID-19 Nesenel Pendemik Rispons na Komisina bilong Polis, David Manning i givim 4,000 box bilong pes mask na ol marasin bilong wasim han i go long Papua Nigini Difens Fos (PNGDF) long Mande, 10 Ogas.

Mista Manning i tok olsem em i bikpela samting long ol memba bilong Join Ejensi Tas Fos olsem PNGDF na Koreksenel Sevis (CS) husat i givim sekyuriti long dispela Nesenel COVID-19 Pandemik Rispons i kisim olgeta ikwipmen long lukautim ol taim ol i helpim ol helt woka long daunim dispela sik.

“Mipela i lukim pinis olsem namba bilong COVID-19 long ol helt woka husat i go pas i wok long i go antap. Mipela i save givim narapela level bilong sapot long dispela hevi na sapos mipela i no was gut, bai mipela i stap insait long dispela namba bilong COVID-19.

“Mi stretim pinis long Nesenel Kontrol Senta, Nesenel Polis Hetkwata, Bomana Polis Kolis na NCD Polis na PNG CS long kantri long kisim ol pes mask na ol marasin bilong wasim han,” Kontrola Manning i tok.

Deputi Dairekta Spesel Sevis Divisen long RPNGC, Sif Inspekta Luvi Florian, i tok em i bikpela samting long lukautim ol opisa husat i wok long lukautim ol boda na helpim ol helt woka long daunim COVID-19.

Mesa Jack Aria i makim maus bilong ol PNGDF na i tok tenk yu long Kontrola Manning long dispela helpim.

“Dispela bai helpim mipela long apim wok bilong mipela. Mipela i tok tenk yu na mipela bai sanap wantaim long winim dispela hevi,” Mista Aria i tok.