OL ekseketiv bilong Maunten M Festivol long Not Wagi, Jiwaka i amamas long Nesenel Kalserel Komisen (NCC) long luksave na rejisterim ol long nesenel kalserel na ivens kalenda.

Las Sande (Julai 24) NCC festivol direkta Andrew Kina wantaim maketing menensa John Umba i givim setifiket ov rejistresen i go long ol ekseketiv, ol memba bilong Maunten M Rurel na Komyuniti Divelopmen Asosiesen, ol yut na ol pipel bilong Bung 1 na 2 wod.

Bikpela smail na amamas i kisim ol dispela manmeri bilong wanem hatwok na sekrifais bilong ol i karim kaikai.

Maunten M Festivol (MMF) siaman James Gising i givim bikpela tenkyu bilong ol i go long Papa God long wanem em i mekim olgeta samting i kamap.

Em i mekim dispela hap tok: "Taim ol pipel i holim strong pasin kalsa na kastom, God i save amamas.

"Olsem tasol, taim yumi fomim asosiesen wantaim astingting long kirapim na promotim kalsa bilong yumi na lukim senis insait long laip bilong yumi insait long kalsa, ating God i amamas tru long dispela pasin.

"Nogat wanpela samting i rong long kalsa. Em samting God yet i givim na yumi mas holim strong kalsa wantaim tenkyu long God," Gising i tok.

Kina na Umba i amamas tu long lukim ol manmeri i mekim pinis graun wok olsem mekim banis, klinim festivol arina, na ogenaisim ol kain kain kalserel grup long kam soim kalsa bilong ol.

MMF bai i kamap long Septemba14-16 long Santu Pita Torot Sigri Praimeri Skul fil, em hap graun we Katolik Sios i tok orait long em ken kamap festivol graun.

Kina i givim strongpela tok olsem dispela setifiket we tupela Umba i givim em laiplain bilong ol na ol mas lukautim gut na wok bung wantaim hatwok na sekrifais long lukim gutpela kaikai.

"Yupela mas no ken traim long bringim politik i kam insait long wok kalsa. Em bai i bagarapim gutpela wok bilong yupela.

"No ken putim mani go pas o tingim mani bipo long yupela wok. Taim ol man i save tingim mani, wok i save pundaun na no gat kaikai bilong em," Kina i tok klia.

Ol manmeri bilong Bung 1 na 2 i amamas long NCC bikos taim em i luksave na rejisterim MMF pasin bilong ol manmeri i senis.

Ol i amamas tu long James Gising long fomim na lonsim Maunten M Rurel na Komyuniti Divelopmen Asosiesen we i mekim rot long MMF long kam insait.

"Bunum Wo komyuniti we i save pairap long nius olsem em wanpela no gut ples we planti pait, raskol pasin, bagarapim ol meri, na gan pait save kamap i nau lukim bikpela senis.

"Kalsa i kam insait na i stopim olgeta no gut pasin na i senisim tingting bilong ol manmeri.

"Ol yangpela bilong mipela nau i laik lusim pasin bilong spak, simuk mariwana na stil.

"Ol i laik wok strong long holim kalsa na pasin bilong lotu long stretim laip na sindaun bilong ol," komyuniti lida Gabriel Gus i tok.

Ol ekseketiv i tok tenkyu long Not Wagi Memba Dokta Fabian Pok long helpim ol wantaim K30,000 olsem sid mani.

HOFFMAN GULGARYE i Raitim