GAVANA Jenerel (GG) Gran Sif Sir Bob Dadae bai i go long Jiwaka provins long Ogas 20 long opim GeruPeng Festival.

Sinia protokol opisa bilong GG Mathew Ding and opisal sekreteri Bill Toraso tokaut olsem Sir Bob i tokim ol ekseketiv bilong GeruPeng Festival olsem em i kisim pinis invitesen na i amamas long kam.

Mista Toraso i toksave long Jiwaka Gavana Dokta William Tongamp na GeruPeng Festival siaman Philip Kapal olsem Sir Bob bai bringim tu ol Kwin Jubili medol long givim long ol wanwan lain we i bin mekim planti gutpela wok na opis bilong GG i luksave long en.

Mista Kapal wantaim ol tim bilong em i amamas tru long kam bilong GG.

"Dispela em bai namba wan festival bilong GeruPeng na long kisim GG i kam insait long komyuniti na provins em bikpela samting tru.

"GeruPeng em ailait bilong Jiwaka kalsa olsem na mipela laik mekim dispela dei kamap gut tru," Mista Kapal i tok.

Ekseketiv i bin skelim pinis ol wok na i givim long ol yut na manmeri long stretim graun wok na redim olgeta samting.

Ol so komiti i nau wok long givim aut invitesen kad na putim ol pablik notis long Banz taun, Kudjip, Minj, Kimil, Nondugl, Kindeng na Kumbal.

Husat ol kalsa grup, wan wan pefoma, o koporet sponsa laik patisipeit long festival o so ken ringim ol dispela lain: Philip Kapal long mobail 76102115, Peter Gelu long mobail 70618773, na Peter Jika long 73983815.

Rijistresen i op pinis na i stap long teilerin stoa bilong Lina Kapal long Banz taun i go inap long Ogas 17. Rijistresen fi em K100 tasol.

Hoffman Gulgarye i raitim