ATONOMUS Rijon bilong Bogenvil (AROB) nau i wok long redi long makim ol nupela memba bilong Haus ov Representativ.Dispela bai namba 4 haus.

Namba wan ileksen bilong Bogenvil Haus ov Representativ i bin kamap long 2005 na leit Joseph Kabui i bin kamap namba wan Presiden. Bihain long em James Tannis i bin stap long sotpela taim tasol na ileksen I kamap gen na ol pipel i makim Dr John Momis husat i stap long tupela tem.

Bogenvil Haus ov Representativ i gat 40 memba na ol i makim 33 konstituensi. Insait long dispela 40 memba 3-pela memba i makim ol meri, na 3-pela memba i makim ol eks paitman, wanpela long wanpela rijon. Bogenvil i gat 3-pela rikon – Not, Sentral na Saut Bogenvil.

Bihainim konstitutsen Bogenvil ol pipel yet bai i votim Presiden bilong ol. Nau yet 26 man na meri i resis long dispela sia.

Long makim spika ol memba yet i save makim wanpela Spika tasol em save kam ausait na ino wanpela long ol memba ol pipel i ilektim.

Paul Wagum i raitim