KEMPEIN bilong 2020 ABG Jenerel Ileksen i go het gut long Bogenvil.

Long sampela konstituensi ol pipel yet i ogenaisim ol rali na singautim ol kendidet long kam na autim ol astingting bilong ol long long sanap long ileksen.

Wanpela long ol dispela konstituensi em Mutuna Huyono Tokunutui konstituensi long Siwai Distrik long Saut Bogenvil.

Rali ya i bin kamap long Sarere 11 Julai, long Sininnai Praimeri Skul graun. Ol yut bilong Sininnai yet i bin go pas long ogenaisim dispela rali. Bihain long ol i wokim stej bilong ol kendidet long sanap na toktok, ol i singautim ol kendidet long kam na na mekim awenes pastaim long ol manmeri long kam na harim ol taim ol i kam bek long autim ol polisi bilong ol.

Narapela bikpela rali em Bogenvil Yumi Wan – wanpela komyuniti bes ogenaisesen (CBO) bilong Bogenvil yet, wantaim sapot bilong Bougainville Council of Churches na Bougainville Media i bin go pas long em.

Dispela rali em bilong ol kendidet husat i wok long sanap resis long sia bilong President. Ol rali i bin kam long Bel Isi Park long Buka, na bihain i go long Independence Park long Arawa na bihain long Buin Taun stej, long Saut Bogenvil.

Planti ol kendidet i bin kam long ol dispela rali na i bin autim ol polisi or platfom bilong ol na tu planti manmeri bin kam na harim ol toktok na planti i bin gat sans long askim sampela askim long ol kendidet na kisim sampela bekim long ol.

Wanpela samting we olgeta kendidet i toktok long em, em lo ol polisi o platfom bilong ol em long indipendens bilong Bogenvil we i bin lukim 98 pesen long ol man meri bilong Bogevil i bin vot long em long taim bilong referendum las yia. Planti i tok ol bai I wok hat tru long mekim dispela laik bilong ol pipel i kamap tru.

Narapela samting em long ikonomi bilong Bogenvil. Bogenvil i mekim K20 milien insait long Bogenvil yet long wan wan yiana dispelaI no inap long ranim kantri. Bogenvil i mas bungim moa long K300 milien long wan wan yia, sampela kenditet i tok.

Narapela em daunstrim prosesing o pasin bilong kamapim stret ol prodak wantaim keskrop olsem kakao bilong Bogenvil.Ol narapela isu em ol isu olsem korapsen. Planti kendidet tok ol i laik rausim pasin korapsen namel long ol politisen na ol pablik sevant. Ol tok korapsen tasol i mekim na ol manmeri long ol ples i no kisim gutpela sevis.

Paul Wagum i raitim