MOA long million balot pepa i kamap pinis long Bogenvil redi long taim bilong ileksen.

Insait long ol balot material i gat 1,025,000 balot pepa na 16,050 kendidet posta. Olgeta i kamap pinis na stap long opis bilong Ilektrel Komisina long Buka.

Olgeta dispela ol i printim long Brisbane na salim i kam.

Kost bilong salim ol balot material i kam long Mosbi na go long Buka inap long PGK1.3 milien.

Dispela operesen ol i mekim wantaim gutpela sekyuriti proses na COVID-19 lo.

Australia Hai Komisin i givim dispela bikpela helpim bihainim askim i bin kam long Opis bilong Bogenvil Ilektrel Komisina George Manu.

Australia Hai Komisina Jon Philp i tok em i amamas Australia i go het long helpim ol Ilektrel proses long PNG.

“Bihain long mipela i bin sapotim Bogenvil Referendum long 2019, mipela i amamas long givim moa sapot long sait bilong lojistik i go long Opis bilong Bogenvil Ilektrel Komisina,” Hai Komisina Jon Philp i tok.

Na wankain helpim i bin kamap tu long 2015 jenerel ileksen.

Komisina George Manu i tok em i amamas long bikpela helpim i kam long Australia Ilektral Komisin. Dispela sapot i helpim Ileksen long kamap gut.

Carolyne Ketsimur i raitim