LONG wok bilong arestim ol pipel, ol polis i save ripot bilong ol manmeri long ol i arestim wanpela man, Polis Minista Bryan Kramer i tok.

Em i tok ol i no save bihainim nating laik bilong ol long taim hevi i kamap.

Mista Kramer i mekim dispela tok long dispela taim we ol pipel i sutim tok long polis i no mekim gut wok na hevi bilong lo na oda i wok long kamap.

Em i tok ol polis i ken arestim ol manmeri taim em i ples klia ol i lukim husat i mekim asua olsem kilim man, bamim kar, bagarapim narapela manmeri na samting bilong ol na stil.

Wanpela bikpela piksa ol manmeri i tok polis i no mekim gut wok bilong ol em long dai bilong Jenelyn Kennedy.

Ol i tok sapos i bin gat gutpela wok, kain hevi bilong Mis Kennedy na ol arapela i inap kamap.

Tasol Kramer i tok planti taim dispela kain tok i no tru.

Em i tok polis i save harim tok bilong ol manmeri na i save arestim ol man tasol meri o famili bilong dispela ol meri i no laik bikos ol i ting man o meri bai senis na kamap gutpela gen.

“Planti ol polis meri i save lukim ol meri i save go wantaim kain kain pasin nogut man ol i save wokim long ol,” Kramer i tok.

“Planti bilong meri i no save laikim polis i arestim ol man long wanem ol i tok ol i man bilong ol.
“Sampela ol i save laikim polis tasol i no gat kar long go arestim man o bikos i hat long askim kot long aplai long IPO o ol i mas kisim pastaim medikol setifiket we ol i save sasim K100 dispela ol meri i no gat mani.

Charlpetson Koi i raitim

“Sampela taim dispela mani i save go long kot tasol kot i gat planti kot keis na ol i save go kam na sampela ol i no save wok na no gat mani bilong bas fe long kamap long kot,” Kramer i tok.

Sampela taim polis tu i no save gat kar o bensin long go kisim ol man na dispela em ol sampela salens polis i bungim.”

Polis Minista i tok Marape-Steven gavman bai i putim jenda bes vailens (GBV) olsem namba wan tok long wok bilong ol na tok bilong Jenelyn i no narapela.

“Mi laik tok tenkyu long ol wok manmeri husat i bin traim long helpim ol lain husat i bungim hevi bilong GBV,” Kramer I tok.

“Nau bai mipela i luksave long yupela na givim kar, bensin na ol narapela risos long mekim wok bilong yupela i kamap gut,” Kramer i tok.