GOROKA Bai ileksen long Isten Hailans bai go het wantaim 22 kendidet.

Namel long ol em tripela i meri kendidet.

Dispela ol meri em Goroka So Kodineta Keryn Hargreaves, Selina Heriso Kengermar na Mary Pati.

Siting memba Henry Ame husat kot bilong dispyutet riten sia i autim em i nominet wantaim olpela memba Bire Kimisopa.

Nau yet luk olsem bikpela resis em bai i stap namel long Ame na Kimisopa.

Ripot Wantok Nius i kisim long elktoral opis long Goroka i tok, nominesen i bin stat long Mande Julai 20 i stop long Fonde Julai 24.

Na poling em bai i stap inap tupela wik stat long Septemba 12 na bai pinis long Septemba 25.

Na kaunim bilong ol vot bai i go het inap long tripela wik bai stat long Septemba 16.

Ripot i go moa na i tok taim nominesen i bin op, ol kendidet i bin i go wantaim ol sapota bilong ol na nominet gut, fri long ol kros na birua.

Na em i soim olsem olgeta kendidet wantaim ol sapota bilong ol i kamapim gutpela bel isi pasin long dispela bai ileksen. tkim lida long palamen long narapela yia na hap bipo long nupela ileksen kamap long 2022.

Goroka bai ilekesen i kamap bihainim Kot ov Disputet Riten Bire Kimisopa mekim egensim ileksen bilong Henry Ame.

Ilektoral Komisin Patilias Gamato i tok em bai kisim K5.6 milien long ranim dispela bai-ileksen.

Olgeta 22 kendidet em Gipene Pirehu Independen, Henry Tutuwo Ame (Pipels Nesenel Kongres) Wilson Orlegge Thomson (Kantri Pati), Steven Rere (Independen), Ben Kua Noel (Independen), Willie Nul Yoba (Independen), Dominic Sintex Gahane (Yunaitet Leba Pati), Bire Kimisopa (Niu Jeneresen), Emmanuel Ijape (Social Demokratik pati), Elijah Gomae (Yunaitet Risos Pati,) Joe Bullet Bulhage (Independen), Jeffrey Sasuwo (Melanesian Alaiens), Kupa Okaro Janis (Independen), Serina Heriso Kengemar (Indipenden), Mary Pati (Model Nesen Pati), Ark Awo Ketaw (Indipenden), Albert Isembo Wamiri (Indipenden), Keryn Hargraeves (Independen), Kiatro Abisinito (Independen), Herbert J. Pokana (Independen), Aiye Humai Tambua (Pangu Pati) na Thompson Haralaq’veh (Independen).

Sape Metta i raitim