TRIPELA meri namel long 22 kendidet bai i resis long bai-ileksen bilong Goroka Open Ilektoret long Isten Hailans Provins.

Ilektoral Komisina Patilius Gamato i tokaut long dispela i no long taim i go pinis. Em i tok dispela tripela meri kendidet em bisnismeri Serina Heriso Kengermar, Seveya Mary Pati na siameri bilong Goroka So na tua opereta Keryn Hargrieves.

Model Nesen Pati i sanapim Mary Pati na narapela tupela meri em tupela Independen Kendidet.

“Mi amamas long dispela tripela strongpela meri husat i putim han i go antap long sanap long resis na mi gat gutpela tingting long ol long dispela taim,” Patilius Gamato i tok.

Mista Gamato i tok, Henry Tutuwo Ame, bipo memba bilong Goroka Open na man husat i bin kotim em Bire Kimisopa tu i resis gen long dispela bai-ileksen.

Long 2017 Nesenel Ileksen, i bin i gat 31 kendidet na foapela em ol meri. Nau long dispela bai-ileksen, 22 kendidet i resis na 3-pela em ol meri.

Vot bai stat long Septemba 12 na pinis long Septemba 26. Na ol rit bai i go bek long Oktoba 16, 2020, long pinisim bai-ileksen bilong Goroka Open.